گوتەبێژی وەزارەتی کشتوکاڵی هەرێمی کوردستان رایگەیاند، تاوەکو 10 رۆژى دیکە باران نەبارێت، کاریگەریی وشکەساڵی لە ناوچەکە دەردەکەوێت.

هیوا عەلی، گوتەبێژی وەزارەتی کشتوکاڵی هەرێمی کوردستان بە کەناڵ8ـی راگەیاند، "دواکەوتنی وەرزی بارانبارین و گۆڕانکارییەکانی کەشوهەوا لە ئەمساڵدا، کاریگەریی بەرچاوی دەبێت لەسەر بەرهەمە کشتوکاڵییەکان، بەتایبەت دواکەوتنی دیاردەی پەڵە لە دەشتی هەولێر، پارێزگاى دهۆک و چەند ناوچەیەکی دیکە، کە بووەتە هۆی دواکەوتنی وەرزی چاندن".

گوتیشی، "ئەگەر تاوەکو ناوەڕاستی ئەم مانگە باران نەبارێت، ئەوا بەروبوومی دانەوێڵەی ئەمساڵ زیانی پێدەگات و کاریگەریی وشکەساڵیمان لەسەر دەردەکەوێت".

گوتەبێژەکەى وەزارەتى کشتوکاڵ، لەبارەى بەرهەمى ساڵى رابردووەوە گوتى، لە رووی بەرهەمهێنانی بەرهەمە کشتوکاڵییەکانەوە ساڵی 2024 ساڵێکی پڕ پیت و بەرەکەت بووە و ئاستی بەرهەمهێنان لە ساڵی 2023 و 2022 باشتربووە".

راشیگەیاند، بەگوێرەی پلانی راگەیەندراوی حکومەتی فیدراڵ بۆ ئەمساڵ رێژەی وەرگرتنی گەنم بۆ 50% کەمکراوەتەوە، چونکە لە سەرجەم پارێزگاکانی عێراق نزیکەی چوار ملیۆن تۆن گەنم وەردەگیرێت و لە جوتیارانی هەرێمی کوردستانیش تەنیا 400 هەزار تۆن گەنم وەردەگیرێت، لە کاتێکدا ساڵی رابردوو نزیکەی 700 هەزار تۆن وەرگیراوە.

عێراق لەساڵی 2024 بە کۆی گشتی شەش ملیۆن تۆن گەنمی وەرگرت و لەو ژمارەیە 685 هەزار تۆن گەنمى لە جوتیارانی هەرێمی کوردستان وەرگرت، نرخی هەر تۆنێک لە گەنمى پلە یەک بە 835 هەزار دینار و گەنمى پلە دوو بە 815 هەزار دینار دیاریکرا.