پارێزگاری بانکی ناوەندیی عێراق لە راگەیەندراوێکدا دڵنیای دەدات کە لە 2025ـدا هیچ گرفتێکی دارایی نابێتە بەربەست لەبەردەم پێدانی مووچەی مووچەخۆران و دەشڵێت، "بەردەوامین لە سنووردارکردنی سپیکردنەوەی دۆلار."
عەلی عەلاق، پارێزگاری بانکی ناوەندیی عێراق رایدەگەیەنێت، " عێراق خاوەن یەدەگێکی دراوی بەهێزە لە رێگەی سەرچاوەکانی و دەتوانێت خواستیش بۆ کڕینی دۆلار لە بازاڕەکانی عێراقدا دابینبکات".
راگەیەندراوەکەی پارێزگاری بانکی ناوەندی لەکاتێکدایە، دەنگۆی کەمبوونەوەی پارەی نەختینەیی لە عێراقدا هەیە و ترس هەیە لەوەی گرفت بۆ دابەشکردنی مووچە دروستبکات، چونکە مووچەی مانگی کانوونی یەکەمی ساڵی رابردوو بۆ بەشێک لە مووچەخۆرانی عێراق دواکەوت و لە کاتی خۆیدا دابەشنەکرا.
هاوکات، لەبارەی سنووردارکردنی سپیکردنەوەی دۆلار لە وڵاتانی دەرەوەی عێراق عەلی عەلاق دەڵێت، " پرۆسەی کارکردن بۆ بەبانکیکردن و پارەدانی ئەلیکترۆنی لە ئاستێکی زۆر باش و پێشکەوتوودایە و دابینکردنی دۆلار بۆ گەشتیاران سەرکەوتووبووە و سەرجەم رێکارە نوێیەکان هۆکاربوون بۆ سنوردارکردنی سپیکردنەوەی دۆلار".
هەروەها پارێزگارەکەی بانکی ناوەندی لەبارەی حەواڵەکردنەوە دەڵێت، "حەواڵە هاتووەکانمان سنوردارکردووە بە مامەڵەکردن بە دینارەوە و رێگەمان بە بانکەکان داوە هاوردەی دۆلار بکەن و توانیومانە رێگە لە سپیکردنەوە و قاچاغچێتی بە دۆلارەوە بکەین".
دڵنیاییەکانی پارێزگاری بانکی ناوەندی لەبارەی سنووردارکردنی سپیکردنەوەی دۆلار لەکاتێدایە، هێشتا بەهای دینار بەرامبەر بە دۆلار لە نزمیدا ماوەتەوە و بەراورد بە نرخی فەرمی نزیکەی 20 هەزار دینار جیاوازیی هەیە لە هەر 100 دۆلارێکدا، رێکارەکانی پێدانی دۆلار بە گەشتیاران ئاسان نییە و بە ئەستەم بەدەست دەکەوێت، بەگشتیش مامەڵەکاران نیگەرانن لەو بڕە دۆلارەی رۆژانە بانکی ناوەندی دەیخاتە بازاڕەوە بەوەی کە بەشی پێداویستی ناوخۆ ناکات.
