دوای لەکارکەوتنی خزمەتگوزارییەکانی پلەیستەیشن، لە رۆژی هەینی، ئەمڕۆ کۆمپانیاکە رایگەیاند، جارێکی دیکە خزمەتگوزارییەکان گەڕاونەتەوە بۆ کارکردن.

پلەیستەیشن لە پۆستێکدا لە تۆڕی ئێکس رایگەیاند، ئێستا بە تەواوی خزمەتگوزارییەکانیان کاردەکەن و داوای لێبووردنی لە بەکارهێنەرانی کرد، بەبێ ئەوەی هۆکاری لەکارکەوتنەکە بخاتەڕوو.

پچڕانی خزمەتگوزارییەکان، بووە هۆی ئەوەی بەکارهێنەران بێبەشبن، لە دەستڕاگەیشتن بە یارییە ئۆنڵاینەکانی وەکو: فۆرتنایت، کاڵ ئۆف دیوتی، گراند سێفت ئەوتۆ و مارڤڵ رایڤاڵز، هەروەها کێشەی بۆ یارییە ئۆفڵاینەکانیش دروستکرد.

بەگوێرەی ماڵپەڕی داوندیتێکتەر، پچڕانی خزمەتگوزارییەکانی پلەیستەیشن لە شەوی هەینیدا دەستیپێکردووە.

پلەیستەیشن لە تۆڕی ئێکس داوای لێبووردنی لە بەکارهێنەرانی کرد و رایگەیاند:"هەموو بەشداربووانی پلەیستەیشن پڵەس، پێنج رۆژی زیادەیان پێدەدرێت".