وەزارەتی گواستنەوە و گەیاندنی هەرێمی کوردستان رایگەیاند، ئەمڕۆ و سبەی ئاسمان هەوری تەواودەبێت و ئەگەری نمەباران و بارانی چڕ لە سەنتەری پارێزگاکان و ناوچە شاخاوییەکان هەیە.

وەزارەتی گواستنەوە و گەیاندنی هەرێمی کوردستان لە راگەیەندراوێکیدا دەڵێت، ئەمڕۆ (19ی ئازار) ئەگەری بارانبارین و هەورەتریشقە هەیە،  لە زۆربەی ناوچە شاخاوییەکان لە سنووری پارێزگای دهۆک ئاستی دابارین  مامناوەند و لێزمەباران دەبێت.

سەبارەت بە کەشی سبەی، وەزارەتەکە ئەوەی خستووەتەڕوو، ئاسمان هەوری تەواو و نیمچە هەور دەبێت لەگەڵ ئەگەری نمە بارانی پچڕپچر لەسەر ناوچە شاخاوییە سنوورییەکان.

هاوکات کەشناسیی عێراقیش، کەشی پێشبینیکراوی چەند رۆژی داهاتووی بڵاوکردەوە و دەڵێت؛ شەپۆلێکی بارانبارین روو لە عێراق دەکات و پلەکانی گەرما نزم دەبنەوە و لەهەندێک ناوچە خۆڵبارینێکی کەم دەبێت و لە رۆژی شەممە شەپۆلی بارانەکە کۆتایی دێت.