وەزارەتى نەوتى عێراق و کۆمپانیای بی پیی بەریتانى، گرێبەستێکیان بۆ پەرەپێدانى چوار کێڵگەی نەوتی کەرکوک واژۆکرد.

نووسینگەی راگەیاندنی سەرۆکوەزیرانى عێراق بڵاویکردەوە محەمەد شیاع سودانی، سەرپەرشتیى واژۆکردنی گرێبەستی نێوان وەزارەتی نەوت و کۆمپانیای (بى پیی بەریتانی)ـی کرد.

گرێبەستەکە بۆ پەرەپێدان و بەرهەمهێنانی نەوتى چوار کێڵگەی نەوتی کەرکوکە، کە بریتین لە کێڵگەکانى هاڤانا، بای حەسەن، جەمبور و خەباز.

بەگوێرەى گرێبەستەکە "نۆژەنکردنەوە و پەرەپێدانی چوار کێڵگەکە بۆ بەرزکردنەوەی یەدەگی سامانی هایدرۆکاربۆن، زیادکردنی رێژەی بەرهەمهێنانی نەوتی خاو بە ئامانجی گەیشتن بە  (420) هەزار بەرمیلى رۆژانەیە".

هاوکات، بەگوێرەى گرێبەستەکە وەبەرهێنان لە گازی هاوەڵ بە نۆژەنکردنەوە و فراوانکردنی دامەزراوەکانی کۆمپانیای گازی باکوور بۆ بەرهەمهێنانی (400) ملیۆن پێ سێجا لە رۆژێکدا و دامەزراندنی وێستگەیەکی کارەبایی بە توانای 400 مێگاوات دەکرێت.

وەستاندنی بەردەوامی سوتانی گازی هاوەڵ بۆ بەرهەمهێنانی نەوتی خاو بە بەکارهێنانی بەشێوەیەکی گونجاو و دابینکردنی سوتەمەنی پێویست بۆ وێستگەکانی کارەبا، بەشێکى دیکەیە لە گرێبەستەکەى نێوان وەزارەتى نەوت و کۆمپانیاى بى پى.