بە بۆنەی سەری ساڵی نەتەوەیی سریانی، ناسراو بە جەژنی ئەکیتۆ، فێستیڤاڵی کەلەپووری سریانی سازدەکرێت.

بە بۆنەی سەری ساڵی نەتەوەیی سریان، ناسراو بە "جەژنی ئەکیتۆ"، وەزارەتی رۆشنبیری و لاوان، بەڕێوبەرایەتیی گشتیی رۆشنبیری و هونەری سریانی، پێنجەم خولی فێستیڤاڵی کەلەپووری سریانی لە شاری هەولێر سازدەکات.

بڕیارە رێکەوتی حەوتی نیسانی 2025، فێستیڤاڵەکە دەستپێبکات و تاوەکو رێکەوتی 10ـی نیسان بەردەوام دەبێت.

فێستیڤاڵی کەلەپووری سریانی، بە رێڕۆیشتنێکی جەماوەریی کاتژمێر پێنجی ئێوارە دەستپێدەکات، کە گوزارشتە لە نەریتی دێرینی سریانی و رێڕۆیشتنەکە لە بەردەم قوتابخانەی ئامادەیی نموونەیی عەنکاوەی بەهرەداران دەستپێدەکات بۆ مۆزەخانەی کەلەپووری سریانی بەرامبەر گردی شوێنەواری "قەسر" و لە رۆژانی فێستیڤاڵدا چەندین چالاکی هونەری و ئەدەبی بەڕێوەدەبرێن.