باجى زیادەى گومرگ کە هەفتەى رابردوو لەلایەن دۆناڵد ترەمپەوە خرایە سەر کاڵاى هاوردە بۆ ئەمریکا، لە بەرەبەیانى ئەمڕۆوە چووە بوارى جێبەجێکردنەوە کە 104%ـى باج دەخرێتە سەر کاڵا چینییەکان، راستەوخۆش پشکى بازاڕە داراییەکان لە ژمارەیەک وڵاتى ئاسیا دابەزین و نرخى نەوتیش بەڕێژەى 4%ـى بەهاکەى لە دەستدا.

هەفتەى رابردوو، دۆناڵد ترەمپ، سەرۆکى ئەمریکا بڕیاریدا باجى زیادە بەرێژەى 10% بۆ 49% بخاتەسەر کاڵاى هاوردە بۆ ئەمریکا و ئەوەش کاردانەوەى فراوانى لەلایەن هاوبەشە بازرگانییەکانى ئەمریکا لێکەوتەوە و هۆشدارییاندا لە سەرهەڵدانى جەنگێکى بازرگانى.

جیاواز لە وڵاتانى جیهان، چین لە کاردانەوەى بڕیارەکانى ترەمپ بڕیاریدا بەڕێژەى 34% باج بخاتە سەر کاڵاى ئەمریکى، بەڵام لە بەرامبەردا دۆناڵد ترەمپ باجى سەر كاڵاى چینى بۆ 104% بەرزکردەوە و لەمڕۆوە دەچێتە بوارى جێبەجێکردنەوە.

ئاژانسى رۆیتەرز بڵاویکردەوە، بەرەبەیانى ئەمڕۆ پشکى بازاڕە داراییەکانى تایوان بەڕێژەى 5.8%، ژاپۆن بەڕێژەى 5% دابەزین.

 هاوکات نرخى نەوت، کە چەند رۆژێکە رووى لە دابەزینە ئەمڕۆ نرخەکەى بەڕێژەى 4% دابەزى، سەپاندنى باجەکان بەرهەمى 60 هاوبەشى بازرگانى ئەمریکا دەگرێتەوە.