لە چەند ساڵێکی سەرەتای تەمەنی منداڵاندا یاریکردن لەگەڵیان گرنگە، چونکە دەبێتەهۆی دروستبوونی زیاتر لە ملیۆنێک پەیوەندیی دەماری لە مێشکیاندا؛ ئەمەش وادەکات مێشکی منداڵان بە شێوازێکی تەندروست گەشەبکات و شێوازی کارکردنی مێشکی منداڵەکەش بە درێژایی ژیانی دیاریدەکات.
لەگەڵئەوەی جینەکانی منداڵەکە رۆڵێکی گرنگیان هەیە لە شێوازی کارکردنی مێشک، بەڵام ژینگە و ئەزموونەکانیش رۆڵی گرنیان هەیە.
بەگوێرەی راپۆرتێکی زانکۆی هارڤارد، ئەو یارییانەی کە منداڵەکان تێیدا هەوڵی وەڵامدانەوە دەدەن، بەڕاستی وادەکەن مێشکییان تەندروستبێت و ئەگەری زیاتری هەبێت لە داهاتوودا کەسانێکی تەندروست، دڵخۆش و سەرکەوتوو دەربچن.
  

پێویستە دایکوباوکان لەکاتی یاریکردن لەگەڵ منداڵەکانیاندا رەچاوی ئەم خاڵانەی خوارەوە بکەن:

• پێویستە لەو کاتەی دایکوباوکەکە یاری لەگەڵ منداڵەکەیان دەکەن، سەرنجی تەواویان لەسەر یارییەکەبێت و دووربکەونەوە لە بەکارهێنانی مۆبایل یان ئەنجامدانی ئەرکەکانی دیکەیان
• پێویستە لەکاتی یارییەکەدا هەردوو منداڵەکە و دایکەکە یان باوکەکە بەشداربن، بە جۆرێک دایکەکە لەوانەیە بە رستەڕستە قسە لەگەڵ منداڵەکەی بکات و منداڵەکە تەنیا بە وشەیەک وەڵامی بداتەوە، یان لەوانەیە منداڵەکە تەنیا بەهۆی ئەو شتانەی دایکی دەیکات یان دەیڵێت، پێبکەنێت، بەڵام هەموو ئەمانە وەڵامن و سوود بە منداڵەکە دەگەیەنن

باشترین ئەو یارییانەی کە گرنگن لەگەڵ منداڵانی تەمەن شەش بۆ نۆ مانیگدا بکرێن:

منداڵان لەم تەمەنەدا وردەوردە فێری لاساییکردنەوە، جوڵە، لێکۆڵینەوە لە هەموو ئەو شتانەی لە دەوروبەریاندایە دەبن و تەنانەت فێری چەند وشەیەکیش دەبن.

باشترین یارییەکان بۆ منداڵانی ئەم تەمەنە:

• باوباوێن
• ئەو یارییانەی تیایاندا بوکەڵەیەک لە ژێر بەتانییەک دەشاریتەوە و یارمەتیی منداڵەکەت دەدەیت لە دۆزینەوەیدا
• قسەکردن لەگەڵ منداڵەکەدا و کاتێک منداڵەکە هەوڵیدا قسەت لەگەڵ بکات، دەتوانیت وای پشانبدەیت کە شتێکی زۆر گرنگی گوتووە و پرسیاری لێبکەیت و وابکەیت هەوڵبدات زیاتر وەڵامتبداتەوە
• یاریی لاساییکردنەوە: لەم یارییەدا ئەگەر منداڵەکە شتێکی کرد، دەتوانیت لاساییبکەیتەوە، بۆنموونە لەوانەیە زمانی دەربکات، دەتوانیت تۆش لاساییبکەیتەوە و زمانت دەربکەیت. لەوانەیە منداڵەکە لەم تەمەندا حەزبکات چەپڵە لێبدات یان دەست بەسەر مێزێکدا بدات و تەپڵ لێبدات، بە ئەنجامدانی هەمان ئەم شتانە لەگەڵیاندا، دڵخۆشدەبن
• گۆرانی گوتن و سەماکردن لەگەڵیان

باشترین یارییەکان بۆ منداڵانی تەمەن 12 بۆ 18 مانگ:

لەم تەمەنانەدا منداڵان توانای قسەکردن و جوڵەیان باشترە و حەزیان لە لاساییکردنەوەیە.

باشترین یارییەکان:

• دروستکردنی خانوو یان هەرشتێک بە میکانۆ، پاشان دەتوانن پێکەوە بیڕووخێنن
• دەتوانیت وایدەربخەیت تەلەفۆنیان لەگەڵ دەکەیت و هەوڵبدەیت وەڵامتبدەنەوە
• بەکارهێنانی سەرین و بەتانی لە دروستکردنی شوێنی یاریکردن یان دروستکردنی شوێنێکی بەرز کە منداڵەکە بتوانێت بەسەریدا سەربکەوێت
• دەتوانیت لە ژێر بەتانییەک خۆت لە منداڵەکە بشاریتەوە و وابکەیت بتدۆزێتەوە یان خۆت خۆت ئاشکرابکەیت
• گۆرانیگوتن و سەماکردن لەگەڵی
• چوونەدەرەوە لەگەڵ منداڵەکەدا تەنانەت ئەگەر بۆ مارکێتێکیش بێت
• نابێت دایکوباوک لەگەڵ منداڵەکەیان تەنیا ئەو وشانە بەکاربهێنن کە منداڵەکە دەیانزانێت، بەکارهێنانی وشەی جیاواز لەگەڵیاندا بەسوودە

 منداڵانی تەمەن 2-3 ساڵ دەتوانن هەمان ئەم یارییانە بەشێوازێکی قورستر بکەن.

دایکوباوکان پێویستە بەسەربردنی کات و یاریکردن لەگەڵ منداڵەکانیان لە پێش بەکارهێنانی مۆبایل و پاککردنەوەی ماڵەوە دابنێن، تەنانەت دەتوانن منداڵەکەیان یارمەتییان بدات لە کارەکانی ماڵەوە و وەکو جۆرێک لە یاریکردنی لێبکەن.