دوای ئەوەی یانەکانی بەرشلۆنە و ریاڵ مەدرید لەم هەفتەیەدا بە زەحمەت بردنەوەیان بەرامبەر رکابەرەکانیان بەدەستهێنا، ئەمشەویش ئەتلەتیکۆ بە ئامانجی بەدەستهێنانی سێ خاڵی یارییەکە و خۆ نزیککردنەوە لە پێشەنگ رووبەڕووی ڤەلەدوەلید دەبێتەوە.

ئەتلەتیکۆ مەدرید بە کۆکردنەوەی 60 خاڵ پلەی سێیەمی ریزبەندیی گرتووە، کە شەش خاڵی لەگەڵ ریاڵ مەدریدی دووەم و 10 خاڵیشی لەگەڵ بەرشلۆنەی پێشەنگ جیاوازە.

کوڕانی دیێگۆ سیمیۆنی ئەمشەو کاتژمێر 22:00 بەکاتی هەرێمی کوردستان، لە یاریگای میترۆپۆلیتانۆ میوانداریی ڤەلەدوەلید دەکەن.

رۆخی بلانکۆس، لەم وەرزەی لالیگا، لە 30 یارییدا، 17 بردنەوە، نۆ یەکسانبوون و چوار شکستی تۆمارکردووە.

تەنیا نازناو کە بۆ تیمەکەی دیێگۆ سیمیۆنی ماوەتەوە، لالیگایە، ئەویش دەبێت سەرجەم ئەم یارییانەی ماویانە بردنەوە بەدەستبهێنن و پێش بەرشلۆنە و ریاڵ مەدرید بکەون، کە تاوەکو رادەیەک قورسە.

لە بەرامبەردا ڤەلەدوەلید، بە 16 خاڵەوە کۆتا پلەی ریزبەندیی گرتووە و وەرزی داهاتوو دادەبەزێتە خولی پلەیەکی ئیسپانیا.

ڤەلەدوەلید تەنیا چوار بردنەوەی تۆمارکردووە، لە بەرامبەردا چوار یەکسانبوون و 22 شکستی هەیە.

دیێگۆ سیمیۆنی راهێنەر لەم یارییە لە تواناکانی ئەنخێل کۆریا، دی پاوڵ و ساموێل لینۆ بێبەشدەبێت.

پێکهاتەی پێشبینیکراوی ئەتلەتیکۆ:

ئۆبلاک

گالان، لێنگلێت، خیمینێز، لۆرێنتی

گالاگەر، باریۆس، کۆکی، سیمیۆنی

ئەلڤارێز، گریزمان

پێکهاتەی پێشبینیکراوی ڤەلەدوەلید:

فێرێرا

کاندێلا، کۆمێرت، ئۆزکاچار، ئازنو

ئەنوەر، یوریچ، نیکیچەر، مۆرۆ

سیلا، لاتاسا