بە بڕیارێکی عێراق بارکردنی گەنم لە سایلۆکانی هەرێمی کوردستانەوە بۆ ئاشەکان بە مەبەستی دروستکردنی ئاردی بەشەخۆراک راگیرا، لە جیاتی ئەوە گەنم لە سایلۆکانی موسڵ و دوزخورماتوو و کەرکوکەوە دەبرێت.

نەسرین ئەحمەد، بەڕێوەبەری بازرگانی و دانەوێڵەی سلێمانی بە کەناڵ8ـی راگەیاند: "تاوەکو ئێستا بڕی 150 هەزار تۆن لە گەنمی ساڵی رابردوو لە نێو سایلۆکانی هەرێمی کوردستان ماوەتەوە و عێراق بڕیاریداوە، ئاشەکان وەرینەگرن تاوەکو گەنمی سایلۆکانی موسڵ و دوزخورماتوو و کەرکوک تەواو نەبێت.

بەگوتەی نەسرین ئەحمەد، "ئەو بڕیارە بارگرانیی بۆ ئاشەکان و بارهەڵگرەکان دروستکردووە و  دەبێت رێگەیەکی دوورتر ببڕن، سەرەڕای ئەوەی کوالیتیی گەنمی کوردستان باشترە".

گوتیشی: "ئەمساڵ عێراق تەنیا 400 هەزار تۆن گەنم لە جوتیاران وەردەگرێت و لە ئێستاوە جێگە نەماوە بۆ عەمبارکردنی گەنمی ئەمساڵ، لە کاتێکدا کوالیتیی بەشێک لە سایلۆکان خراپە و لە ئاسن دروستکراون، ئەمەش لە وەرزی گەرمادا گرفت بۆ گەنمەکە دروستدەکات".

ئاماژەی بەوەشدا: "هۆکاری سەرەکیی بڕیارەکەی عێراق بۆ ئەوە دەگەڕێتەوە، کە ساڵی رابردوو بڕێکی زۆر لە گەنم لەو پارێزگایانە وەرگیراوە و وەزارەتی کشتوکاڵ و بازرگانیی عێراق ناچارە لە زووترین کاتدا گەنمی سایلۆکان خاڵی بکات و ئامادەکاری بکات بۆ بەبازاڕکردنی گەنمی ئەمساڵ".

لە هەرێمی کوردستان شەش سایلۆ و دوو بەنکەر هەن بۆ هەڵگرتنی گەنم و پێویستییان بە نۆژەنکردنەوە هەیە.