حکومەتی نوێی ئەڵمانیا لە یەکەم هەنگاویدا دژی پەنابەرانی نایاسایی، فەرمانی بە پۆلیسی سنوورەکان کرد هەموو ئەو پەنابەرانە رەتبکەنەوە کە داوای مافی پەنابەرێتییان کردووە و هێزێکی زۆری پۆلیسیشی رەوانەی سنوورەکان کردووە.

ئەلێکساندەر دۆبریند، وەزیری ناوخۆی ئەڵمانیا لەو بارەیەوە رایگەیاند، هەموو ئەو پەنابەرانە رەتدەکەنەوە کە دۆکیۆمێنتی پەنابەرێتییان پێنەدراوە.

ئاشکراشی کرد، فەرمانێکیان بۆ جێبەجێکردنی ئەو پلانە دەرکردووە و بۆ ئەو مەبەستەش هەزاران پۆلیسیان رەوانەی سنوورەکان کردووە.

بەگوێرەی زانیارییەکانی وەزیری ناوخۆی ئەڵمانیا، بڕیاری دیپۆرتکردنەوەی پەنابەران چەند گرووپێکی وەکو ژنی دووگیان و منداڵان ناگرێتەوە.

فەرمانەکە 24 کاتژمێر پاش دەستبەکاربوونی فرێدریش مێرز وەک راوێژکاری نوێی ئەڵمانیا کە پێشتر دژایەتی زۆری بۆ هاتنی بەلێشاوی پەنابەران دەربڕیوە و بەڵێنیشیداوە هاتنی پەنابەران بەڕێژەیەکی بەرچاو کەمبکاتەوە.

هاوکات، حکومەتى ئەڵمانیا بڕیارێکی ساڵی 2015ـی دەسەڵاتی پێشووی هەڵوەشاندەوە کە رێگە بە پەنابەرانی بێ دۆکیۆمێنتی وڵاتی سێیەم دەدات بچنە ناو وڵاتەکە.