میدیاى ئەڵمانیا بڵاویکردەوە، ژیوار حاجبی، راپەری کورد، ناسراو بە "خەتەر" لەناو ماڵەکەى خۆی لە شارى کۆڵنى ئەڵمانیا لە تەمەنى 43 ساڵیدا گیانیلەدەستداوە.

خەتەر، لە شارى سنەى رۆژهەڵاتى کوردستان لەدایکبووە و لە منداڵیدا لەگەڵ دایک و باوکی روویان لە ئەڵمانیا کردووە، هاوسەر و پێنج منداڵی هەیە.

رۆژنامەى بێڵدى ئەڵمانى بڵاویکردووەتەوە، شەوی پێنجشەممە لەسەر هەینی، هونەرمەندى راپەر، خەتەر گیانیلەدەستداوە و تاوەکو ئێستاش هۆکاری مردنەکەى دیار نییە.

داواکاری گشتیی شاری کۆڵن، مردنى خەتەرى بۆ میدیاى وڵاتەکەى پشتڕاستکردووەتەوە و رایگەیاندووە، هونەرمەندەکە لە 8ـى ئایار لە کاتژمێر 18:30 لە شوقەیەکی شارى کۆڵن بە مردوویی دۆزراوەتەوە.

داواکارى گشتیى کۆڵن باسى لەوەشکردووە، پشکنینی جەستەیی بۆ هونەرمەندەکە کراوە و هیچ نیشانەیەکی توندوتیژی بە جەستەیەوە نەبووە، ئەنجامی راپۆرتی کۆتایی هۆکارى گیانلەدەستدانیشى لە چەند هەفتەی داهاتوودا بڵاودەکرێتەوە.

خەتەر لە زینداندا ئەلبوومێکی گۆرانى راپى تۆمارکرد و  لەساڵى 2022شدا ژیانى کرا بە فیلم و ناوى لێنرا راینگۆڵد کە لە کتێبى ژیاننامەى خۆیەوە وەرگیرابوو، ئەو کات و لە یەکەم نمایشی فیلمەکەدا لە شاری کۆڵن رایگەیاند، "چیتر من تاوانکارێک نیم".

خەتەر شەش ئەلبوومی گۆرانی و  ژمارەیەک گۆرانیی دیکەى بە جیا بڵاوکردووەتەوە، جگە لە دروستکردنى ژمارەیەک فیلمى سینەمایی.

خەتەر، هونەرمەند و سەرمایەدار بوو و لەسەر ئاستى ئەڵمانیا بەناوبانگ بوو و گۆرانییە راپەکانى بە زمانى ئەڵمانى بڵاوکردووەتەوە و بەگوێرەى میدیاى ئەڵمانیا، مردنەکەشى لەناو هونەرمەندان و لایەنگرانى هونەرى هیپ هۆپدا شۆکهێنەربووە.