رێباز حەملان، بریکارى پێشووى وەزارەتى دارایى عێراق بە کەناڵ8ـى راگەیاند، "حکومەتى هەرێمى کوردستان هاوشێوەى مانگەکانى پێشتر، لیستى مووچەى بە سیستمى پەیڕۆڵ ئامادە کردووە و لەکاتى خۆیدا رەوانەى بەغداد کراوە".

رێباز حەملان، باسى لەوەشکرد، حکومەتى عێراق مووچەى مانگى نیسانى دابەشکردووە و تەنیا پارەى بۆ هەرێمى کوردستان نەناردووە، تاوەکو ئێستاش نازانن هۆکارەکەى چییە، لەکاتێکدا داهاتى نانەوتى لەوادەى خۆیدا رەوانەکردووە.

رێباز حەملان: بە بڕیارى بەغداد دامەزراندن بۆ ئەمساڵ راگیراوە

رێباز حەملان، بریکارى پێشووى وەزارەتى دارایى عێراق ئەوەشى بە کەناڵ8ـى راگەیاند، "حکومەتى هەرێمى کوردستان و بەڕێوەبەرایەتیى بودجە و لایەنە پەیوەندیدارەکان، لەگەڵ بەغداد هەماهەنگییان بۆ رێکخستنەوەى پلەى وەزیفى کردووە و بەغداد رەزامەندى لەسەر یو پى ئێن داوە".

رێباز حەملان، راشیگەیاند، بەغداد بۆ ئەمساڵ دامەزراندنى راگرتووە و هەوڵدەدەین بۆ ساڵانى داهاتوو بتوانین لەشوێنى ئەوانەى خانەنشین بوون، دامەزراندن بۆ هەرێمى کوردستان بکرێت.

رێباز حەملان: داهاتى نانەوتیی نێردراوە و کێشەکە سیاسییە

رێباز حەملان، بریکارى پێشووى وەزارەتى دارایى عێراق گوتیشى، "حکومەتى هەرێمى کوردستان هاوشێوەى مانگەکانى پێشتر داهاتى نانەوتیی رەوانەى بەغداد کردووە و کێشەکە سیاسییە".

رێباز حەملان، راشیگەیاند، هیوادارین مووچەى مانگى نیسان ئەم هەفتەیەدا دابەش بکرێت، چونکە لەگەڵ بانکى ناوەندیى عێراق لقى هەولێر قسەمان کردووە و پێیان راگەیاندووین، "نەک پارەى مووچەى یەک مانگ، بەڵکو پارەى مووچەى دوومانگیش ئامادەیە".