لەگەڵ نزیکبوونەوەی وەرزی پێگەیشتنی هەنجیردا، خەڵکی زیاتر روو لەم میوەیە دەکەن. هەڵبەتە هەنجیر چەندین سوودی تەندروستیی جۆراوجۆری هەیە.

هەنجیر لە بازاڕدا بە چەندین جۆری جیاواز بەردەستە: هەنجیری فرێش، مرەبا و وشککراو. هاوکات هەنجیری فرێش بە چەندین رەنگی جیاواز بوونی هەیە، لەوانەش رەنگی رەش و زەرد. هەنجیر میوەیەکی تەندروست و سوودبەخشە، سەرچاوەیەکی دەوڵەمەندە بە ریشاڵە خۆراکییەکان، دژەئۆکسانەکان و خۆراکەماددەکانی دیکە. هەڵبەتە هەنجیر بڕێکی زۆر لە شەکر لەخۆدەگرێت، بۆیە ئەوانەی نەخۆشیی شەکرەیان هەیە، پێویستە بەوریاییەوە مامەڵەی لەگەڵدا بکەن و بڕێکی زۆری لێنەخۆن. واتا دەشێت تووشبووانی شەکرە هەنجیر بخۆن، بەڵام بە بڕێکی سنووردار.

سوودە تەندروستییەکانی هەنجیر بەگشتی خۆیان دەبیننەوە لە:

• دەوڵەمەندە بە ریشاڵی خۆراکی، کانزا و ڤیتامینەکان: یەکێک لە سوودە گەورەکانی هەنجیر بریتییەلە دەوڵەمەندیی بە خۆراکەماددە جۆراوجۆرەکان، لەوانەش ڤیتامین کەی، ڤیتامین B6، پۆتاسیۆم، کۆپەر، ئاسن، مەنگەنیز و مەگنیسیۆم.
• باشترکردنی تەندروستیی دڵ: دەشێت هەنجیر بارودۆخی تەندروستیی دڵ باشتربکات و ئاستی فشاری خوێن رێکبخات. هاوکات هەندێ لە توێژینەوەکان ئاماژە بەوە دەدەن کە هەنجیر هاریکارێکی باشیشە لە رێکخستنی ئاستی کۆلیسترۆڵی خوێندا.
• باشترکردنی کرداری هەرس:  بوونی ریشاڵی خۆراکی لەم بەرهەمە سروشتییەدا، وا دەکات پرۆسەی هەرس باشتر ببێت. لەلایەکی دیکەوە هەنجیر سەرچاوەیەکی خۆراکیی باشە بۆ بەکتریا سوودبەخشەکانی نێو ریخۆڵە؛ ئەو بەکتریایانە هەوکردن کەمدەکەنەوە و سیستمی بەرگری بەهێزتر دەکەن.
• دەوڵەمەندە بە دژەئۆکسانەکان: هەنجیر دژەئۆکسانەکان لەخۆدەگرێت کە پرۆسەی پیربوون خاودەکەنەوە، چالاکیی مێشک باشتر دەکەن، پێست بە تەندروستییەکی باشەوە دەهێڵنەوە و رێگریی لە تووشبوون بە نەخۆشییە فرەجۆرەکان دەکەن.