بۆ ساڵی دووەم، کۆنفرانسی نێودەوڵەتی زانستیی "جینۆسایدی گەلی کوردستان ورەنگدانەوەی لە ئەدەب، هونەر و میدیادا" رێکدەخرێت.
لیژنەی باڵای ئامادەكاری كۆنفرانسی نێودەوڵەتیی زانستیی "جینۆسایدی گەلی کوردستان و ڕەنگدانەوەی لە ئەدەب و هونەر و میدیادا" رایگەیاندووە، کۆنفرانسەکە بە چاودێری حەمەی حەمەسەعید، وەزیری ڕۆشنبیری و لاوانی حکومەتی هەرێمی کوردستان بەڕێوەدەچێت.
بۆ ئەو مەبەستەش، وەزارەتی ڕۆشنبیری و لاوان بانگەشەی توێژەران و ئەکادیمیانی کورد و بیانی دەکات، بە توێژینەوە زانستییەکانیان بەشداری بکەن.
تەوەرەکانی کۆنفرانسەکەش پێکهاتوون لە (جینۆسایدی گەلی کوردستان و رەنگدانەوەی لە ئەدەبدا (چیرۆک، رۆمان، شیعر، ئەدەبی زارەكی، وەرگێڕان،.. )، جینۆسایدی گەلی کوردستان و رەنگدانەوەی لە هونەردا (فیلم، شانۆ، دراما، میوزیک، شێوەكاری، ..)، رۆڵی میدیا لە بڵاوکردنەوەی بەرهەمە ئەدەبی و هونەرییەکانی تایبەت بە جینۆسایدی گەلی کوردستان و ناساندنی پرسەكانی).
بەشداریکردنیش بەپێی بڕیاری وەزارەتەکە، وادە و چەند مەرجێکی دیاریکراوی هەیە، سەرجەم توێژینەوەکانیش لە توێی کتێبێکدا چاپ دەکرێن و بە دیاری پێشکەش بە توێژەران و میوانانی کۆنفرانس دەکرێت.
