بەشی پێنجەمی فیلم ئانیمەیشنی بەناوبانگی "Toy Story" بەرهەمدەهێنرێت و ئاندرو ستانتۆن وەکو دەرهێنەر و نووسەری فیلمەکە بەشداریی تێدا دەکات.
هەریەک لە کارەکتەرانی وودیی و بەز، دەگەڕێنەوە بۆ جیهانی سەمەرە و پڕ لە سەرکێشیی چیرۆکی بووکەڵەکان، بڕیارە ئاندرو ستانتۆن دەرهێنان بۆ ئەم بەشەیان بکات و ئاماژە بەوە دەدات؛ لە چیرۆکی نوێی بووکەڵەکاندا، کارەکتەرە سەرەکییەکان بەرەنگاری جیهانێکی پڕ لە ئەلیکترۆنیی دەبنەوە و نەیارەکانیان خاوەنی تەکنەلۆجیای بەرەوپێشچوو دەبن.
ساڵی 2019 لەگەڵ بڵاوبوونەوەی بەشی چوارەمدا، هەواداران ستایشێکی گەورەیان کرد و توانی زیاتر لە یەک ملیار دۆلار لە ئاستی جیهانییدا کۆبکاتەوە و ببێت بە یەکێک لە سەرکەوتووترین بەشەکانی چیرۆکی بووکەڵەکان.
بەگوێرەی زانیارییەکان، بەشی پێنجەم رێکەوتی 19ی حوزەیرانی 2026 بڵاودەبێتەوە و لە ئێستاوە هەواداران بە چاوەڕوانییەکی زۆرەوە دەیانەوێت چیرۆکی هەردوو کارەکتەری وودی و بەز لە جیهانێکی نوێدا ببیننەوە.
