یارییە نێودەوڵەتییەکان وەکو پشوویەک بوو بۆ یانە گەورەکانی ئەوروپا، بەڵام بۆ ئارسیناڵ بووە گرفتێکی گەورە و هیچ یانەیەک هێندەی یانەکەی میکێل ئارتێتا بەهۆی یارییەکانی نەیشنزلیگ و پاڵاوتنەکانی مۆندیالەوە زیانی بەرنەکەوت، شەش یاریزانی یانەکە تووشی پێکان بوون و یاریزانێک بەهۆی راگرتنەوە ناتوانێت لە یاریی داهاتوودا بەشداریبکات.
بەهۆی یارییە نێودەوڵەتییەکان و پێکانەکانی پێشووترەوە، ئێستا نەخۆشخانەی ئارسیناڵ جمەی دێت و شەش یاریزان چارەسەری تێدا وەردەگرن، تەنانەت دووان لەو یاریزانانەش کە لە ئارسیناڵەوە بە خواستن روویان لە یانەکانی دیکە کردووە و پێکهاتوون لە ئالبێرت لۆکۆنگا و فابیۆ ڤێرا، بە پێکانەوە گەڕاونەتەوە بۆ یانەکانیان.
پێکراوەکانی ئارسیناڵ بریتین لە مارتین ئۆدیگارد، کە لە یاریی نێوان نەرویج و نەمسا دووچاری نوشتانەوەی قولەپێ بوو، دواتریش وێنە و تۆمارەکانی بڵاوبوونەوە، کە بە دارشەقەوە دەچێتە نێو فڕۆکەیەکی تایبەتەوە، میکێل مێرینۆش، کە نوێترین گرێبەستی یانەکەیە، شانێکی شکاوە و پێناچیت بەم نزیکانە بگەڕێتەوە، تاکیهێرۆ تۆمیاسو و کیران تێرنیش بەهەمانشێوە لە نەخۆشخانەی یانەکەی لەندەن چارەسەروەردەگرن.
لەهەموو ئەو پێکانانە سەیرتر، پێکانی ریکاردۆ کالافیۆری بەرگریکاری ئیتاڵیا بوو، کە لەیاریی نێوان ئیتاڵیا و فەرەنسا، بەهۆی کەوتنی عوسمان دێمبیلییەوە بەسەر پێیەکانیدا بەناچارییەوە یاریگەی بەجێهێشت، هەرچەندە پزیشکی ئیتاڵیا پێیوایە پێکانەکە قورس نییە، بەڵام هەرچۆنێک بێت ئەو بەرگریکارەش پێویستی بە پشوو و چارەسەرە.
ئەوەی بۆ ئارتێتا مایەی ترسە ئەوەیە، دوای دەستپێکردنەوەی چالاکییەکانی پرێمەرلیگ، رۆژی یەکشەممە ئارسیناڵ لە یاریگەی تۆتنهام دێربیی لەندەن بەرامبەر تۆتنهام ئەنجامدەدات، سەرباری بەشدارینەکردنی بەشێک لەو یاریزانانە، بەتایبەت ئۆدیگارد، ناتوانێت سوود لە تواناکانی دیکلان رایس وەربگرێت، کە لەدوایین یاریدا بەرامبەر برایتۆن بەکارتی سوور لە یاریگە کرایە دەرەوە، بەهەمانشێوە گابریێل جیسۆزی بەڕازیلی کە لەلێواری گەڕانەوەدایە و کەس نازانێت دوای گەڕانەوە چی بەسەردێت و بە چ ئاستێکەوە دەردەکەوێتەوە.
