پاریس سان جێرمان سەردەمێکی نوێ لەگەڵ لویس ئێنریکیی راهێنەری ئیسپانی دەستپێدەکات، ئەمشەو لە یاریگای پارک دی پرینس یەکەمین یاریی وەرزی نوێی چامپیۆنزلیگ بەرامبەر یانەی جیرۆنای ئیسپانی ئەنجامدەدات.
پاریسییەکان لەدوایین حەوت وەرزیان لە ناوخۆی فەرەنسا، شەشجار پاڵەوان بوون و گەورەی وڵاتی کەلەشیرەکانن، لەبەرامبەردا جیرۆنا بەبێ ئەوەی یەکێکبێت لە گەورەکانی ئیسپانیا، بووەتە سوپرایزێکی گەورە و خانەی سێیەمی لالیگای بەدەستهێنا.
پاریسییەکان گەشبینن بەوەی کە تەنیا یانەی خولی فەرەنسان کە لەم وەرزەدا تەواوی خاڵەکانیان چنیوەتەوە و لویس ئێنریکی توانیویەتی ئەو هاوسەنگییە دەستەبەربکات کە جەندین ساڵە بە دەیان راهینەر نەکراوە،تەنانەت نەیهیشتووە کاریگەریی رۆیشتنی کیلیان ئێمباپێ لەپێکهاتەکەدا رەنگبداتەوە.
خاوەنە قەتەرییەکانی پاریس سانجێرمان لە 2011وە خەونیان چامپیۆنزلیگە، بەڵام بەرزترین پێگە کە پێیگەیشتوون 2019-2020 بوو کاتێک لە یاریی کۆتایی بەرامبەر بایرن میونشن شکستیانهێنا.
یانەکەی فەرەنسا سەرەڕای ئەوەی دەستکەوتێکی نییە، بەڵام بەهێزە، لەدوایین 36 یاریدا تەنیا یەک یارییان لە یاریگەی خۆیاندا دۆڕاندووە، بۆیە لەم یارییەدا گەشبینن بە سەرکەوتن بەرامبەر جیرۆنا.
لەبەرامبەردا، جیرۆنا لەم وەرزەدا هاوشێوەی وەرزی رابردوو نەبووە و دوای لەدەستدانی چەند یاریزانێکی کاریگەری یانەکە لەمێرکاتۆی هاوینەدا، دوایین یارییان بەشکستهێنان بە ئەنجامێکی قورس بەرامبەر بەرشلۆنە کۆتاییهات، ئەمشەو میچێلی راهێنەر، هەموو هەوڵێکدەدات ئەو برینە ساڕضژبکات و هاوشێوەی سوپرایزەکانی وەرزی رابردوو ببێتە پاڵنەر بۆ یاریزانەکانی و لە یەکەم دەرکەوتنیان لە چامپیۆنزلیگ قەرەبووی ئەو شکستە بکاتەوە.
