فاتێح بادپەروا، سەرپەرشتیاریی فێستیڤاڵی نێودەوڵەتیی شانۆی سەر شەقام لە مەریوان رایگەیاند، هەفتەیەکی دیکە، 17ـەمین فێستیڤاڵی نێودەوڵەتیی شانۆی سەر شەقام لە شاری مەریوان دەستپێدەکات و حاجی لەق لەقیش وەک هێمای فێستیڤاڵەکە دیاریکراوە.

بادپەروا راشیگەیاند، فێستیڤاڵی شانۆی سەر شەقامی ئەمساڵ لە مەریوان لە ساڵانی دیکە جیاوازتر دەبێت و بەشی نیشتمان بۆ فێستیڤاڵەکە زیادکراوە.

سەرپەرشتیاریی فێستیڤاڵی نێودەوڵەتیی شانۆی سەر شەقام لە مەریوان گوتیشی "بودجەی تەرخانکراوی ئەمساڵ بۆ فێستیڤاڵەکە 120 هەزار دۆلارە، کە ناوەندی هونەری نمایش و بەشی بەرنامە و بودجەی پارێزگای سنە، شارەوانی و ئەنجوومەنی شارەوانی و ئەنجوومەنی کارگێڕیی شاری مەریوان بودجەکەی دابین دەکەن".

بادپەروا باسی ئەوەشیکرد، لە 11ـی تشرینی یەکەمەوە پێشوازی لە بەشداربووان دەکرێت، رۆژی دواتر تیپە شانۆییەکان بە ئامادەبوونی خەڵک و بە کەڕنەڤاڵ لە شەقامی کۆمارییەوە بەرەو پارکی میللەت دەڕۆن و دواتر دەست بە نمایشی شانۆکانیان دەکەن.

تیپەکان شانۆکانیان، لە پارکی میللەت، پارکی شانۆ، دەریاچەی زرێبار و مەیدانی باوەڕشی نمایش دەکەن و فێستیڤاڵەکەش رۆژی 16ـی تشرینی یەکەم کۆتایی پێدێت.

دەورووبەری دەریاچەی زرێبار لە مەریوان بە تایبەتی گوندی دەرەتفێ، زیاتر لە 15 ساڵە بووەتە شوێنێکی گرنگی حەوانەوەی حاجی لەق لەقەکان و نازناوی پایتەختی حاجی لەقەلەقاکانیشی پێدراوە. هاونیشتمانییان حاجی لەق لەقەکان دەپارێزن و خۆراک و هێلانەیان بۆ دابین دەکەن، ئەوەش بووەتە هۆی ئەوە ساڵ لە دوای ساڵ ژمارەیەکی زیاتر لە حاجی لەق لەقەکان روو لە ناوچەکە بکەن.