لەگەڵ ئەوەی تیکتۆک ئەمساڵ دووچاری دادگایکردن بووەوە لەلایەن کۆنگرێس و سەرۆکی ئەمریکاوە و تاوەکو ئێستا لەژێر لێکۆڵینەوەدایە، رۆژی 8ی تشرینی یەکەمی 2024، 14 ویلایەتی ئەمریکاش سکاڵای یاساییان لەسەر تۆڕە کۆمەڵایەتییەکە تۆمارکرد.
ویلایەتەکان لەنێویاندا نیویۆرک، کالیفۆرنیا، واشنتن و نیوجێرزی تێدایە، تیکتۆک بەوە تۆمەتباردەکەن کە پلاتفۆرمەکە زیان بە بەکارهێنەرانی گەنج دەگەیەنێت و شکستی هێناوە لە دڵنیابوون لە سەلامەتییان. لەگەڵ ئەوەشدا تیکتۆک تۆمەتبار دەکەن بە بەکارهێنانی پڕۆگرام و ئەلگۆریتمی ئالوودەکەر بۆ ئەوەی منداڵان بۆ ماوەیەکی درێژ سەرقاڵی تۆڕە کۆمەڵایەتییەکەبن. داواکاران دەشڵێن تیکتۆک واپیشاندەدات کە ڤیدیۆ و ناوەڕۆکەکانی پلاتفۆڕمەکەی کۆنترۆڵدەکات بەلام لەراستیدا وانییە.
لە بەرامبەردا تیکتۆک ئەو تۆمەتانەی رەتکردەوە و بە "نادروست و چەواشەکارانە" ناوی برد، جەختیشی لەسەر رێوشوێنە سەلامەتییەکانی ئێستای خۆی بۆ منداڵانی خوار تەمەنی یاسایی کردەوە.
