هێڵی ئاسمانی دێڵتا، سکاڵای لەسەر کۆمپانیای کراودسترایکی تایبەت بە ئاسایشی ئەلیکترۆنی تۆمارکرد کە لە مانگی تەمووزی ئەمساڵ، هەڵەیەکی کۆمپانیاکە بووە هۆی پەکخستنی چەندین سیستمی ئەلیکترۆنی و گەشتی زیاتر لە ملیۆنێک کەسی لە جیهاندا وەستاند.

دێڵتا لە سکاڵاکەیدا هەڵەکەی کراودسترایکی بە "کارەساتبار" ناوبردووە، کۆمپانیای کراودسترایکیش لە وەڵامدا دەڵێت:"بانگەشەکانی کۆمپانیای دێڵتا لەسەر بنەمای زانیاری هەڵەن، نیشانەی نەبوونی تێگەیشتنە لە چۆنیەتی کارکردنی ئاسایشی ئەلیکترۆنی مۆدێرن و هەوڵێکی بێهیوایە بۆ تاوانبارکردنی لایەنێکی دیکە، بەهۆی خاوی لە چارەسەرکردنی شکستەکە".

کۆمپانیای دێڵتا، لە ساڵی 2022ەوە بەرهەمەکانی کراودسترایکی کڕیوە و بەکاریدەهێنێت، رایگەیاند کێشە تەکنیکییەکەی کراودسترایک، ناچاری کردووە حەوت هەزار گەشتی ئاسمانی هەڵبوەشێنێتەوە، ئەمەش کاریگەری لەسەر یەک ملیۆن و 300 هەزار سەرنشین بۆ ماوەی پێنج رۆژ دروستکردووە و زیانی 500 ملیۆن دۆلاری بە هێڵی ئاسمانی دێڵتا گەیاندووە.

کێشە تەکنیکییەکەی 19ی تەمموزی ئەمساڵ، بووە هۆی هەڵوەشاندنەوەی گەشتە ئاسمانییەکان لە سەرانسەری جیهان و کاریگەری لەسەر پیشەسازییەکانی دیکەی جیهان دروستکرد، لەوانە بانکەکان، سێکتەری تەندروستی، کۆمپانیاکانی میدیا و زنجیرە هۆتێلەکان و 8.5 ملیۆن کۆمپیوتەری ویندۆزی مایکرۆسۆفتی لەکارخست.