برنج یەکێکە لە خواردنە سەرکییەکانی سەر خوانی زۆربەی خێزانی کوردی، بەردەوام ئەو پرسیارە دەکرێت: چۆن بتوانم برنج بخۆم بەبێ ئەوەی قەڵەو ببم یان ببێتەهۆی دروستبوونی ورگ؟
ئەم رێنماییانە ئەگەر بتوانرێت جێبەجێبکرێت ئەوا بە رێژەیەکی باش رێگە دەگرێت لە قەڵەوی و زیادبوونی کێش و دروستبوونی ورگ:
- لە رۆژێکدا یەک ژەم برنج بخورێت نەوەکو دوو ژەم یان زیاتر
- برنجی دەنکدرێژ باشترە لە برنجی خڕ، برنجی بۆر و قاوەیی و برنجی کوردی باشترن لە برنجی سپی
- بە پڵاو لێ بنرێت یان بڕێکی کەم زەیتی زەیتوون یان زەیتی کانولا یان رۆنی ئاژەڵ لێ بنێرێت، واتە هێندە کەم بێت بنکڕ دروست نەکات و گەر بنکڕی لەگەڵ بوو نەخورێت ، نابێت لە رۆندا بخێنرێت
- پێش تێکردنی برنجەکە بە 10 بۆ 15 خولەک، قاپێکی گەورەی زەڵاتەی وەرزی لە سەر سفرە دابنرێت و بخورێت ، دوای تەواوبوونی زەڵاتەکە ئینجا برنج و شلەکە بهێنرێتە سەر سفرە، نەوەکو بە یەکەوە بخورێن، ئەمەش لەبەر ئەوەی خواردنی زەڵاتە پێش ژەمەکان هۆکارە بۆ ئەوەی کەمتر بخۆین
- رۆژانە لە 10 بۆ 12 کەوچک زیاتر برنج نەخورێت، پێویستە کەیبانووی ماڵ بەقەد ژمارەی ئەندامانی خێزان چێشت لێبنێت
- هەموو کەوچێک برنج دوو کەوچک شلە یان لانی کەم کەوچکێک شلەی لەگەڵدا بخورێت
- پێویستە لە رۆژێکدا ژەمێک زیاتر برنج نەخورێت، گەر بتوانرێت رۆژ نا رۆژێک یەک جار بخورێت
- خواردنی نان یان سەموون لەگەڵ برنج و شلە ئەگەری قەڵەوی و زۆربوونی کێش زیاددەکات
د. کامەران رەسووڵ ژاژڵەیی، پزیشکی پسپۆڕی خۆراک
