یانەی سەیدسادق، بەپێچەوانەی هەموو پێشبینییەکانەوە بەشێوەیەکی فەرمی بەشداریکردنی لە وەرزی نوێی خولی نایابی تۆپی پێی کوردستان راگەیاند.

یانەی سەیدسادق، بەسەرۆکایەتی تەیبی حاجی رەشید، لەماوەکانی رابردوودا بەدەست قەیرانی داراییەوە دەیناڵاند و هیچ لایەنێک ئامادەنەبوو کێشەکانیان بۆ چارەسەربکات، بەڵام دوای راکێشانی تیروپشکی وەرزی نوێی خولەکە دەرکەوت، کە سەیدسادق بەشداری دەکات و لەیەکەم تاقیکردنەوەیدا لە یاریگەی خۆی میوانداری یانەی هەولێر دەکات.

سەرۆکی یانەی سەیدسادق، لەلێدوانێکی تایبەتدا بە کەناڵ 8ـى راگەیاند، کە موسعەب عەباسی راهێنەری پێشووتری یانەکانی مەسافی و دیالە، ئەرکی راهێنەرایەتی یانەکەی شارەزووری پێبەخشراوە، هاوکات ئەمڕۆ یەکەم یەکەی مەشق و راهێنانی ئامادەکاری بۆ وەرزی نوێ لە یاریگەی خۆیاندا ئەنجامدەدەن و وابڕیارە کۆمەڵێک گرێبەستی نوێش بۆ یانەکە ئەنجامبدەن.