راوێژکاری ئاسایشی نیشتمانیی عێراق، بەکارهێنانی کایەی ئاسمانی عێراق بۆ هێرشکردنەسەر ئێران و وڵاتانی دراوسێی رەتدەکاتەوە.
ئەمڕۆ شەممە، قاسم ئەعرەجی، راوێژکارى ئاسایشی نیشتمانیی عێراق لەگەڵ لیوا مەجید قلی پوور، پاشکۆی سەربازیی باڵیۆزخانەی ئێران لە عێراق، کۆبووەوە.
ئەعرەجی و قلی پوور، گفتوگۆیان لەبارەى یاداشتنامەی لێکتێگەیشتنی ئەمنیی نێوان بەغداد و تاران سەبارەت بە کۆنتڕۆڵکردنی سنوورەکان و هەماهەنگیی نێوانیان لە بوارەکانی تیرۆر و قاچاخدا کردووە.
راوێژکارى ئاسایشی نیشتمانیی عێراق رایگەیاندووە "عێراق بە توندی سەرزەنشتی بەکارهێنانی ئاسمانەکەی دەکات، بۆ دەستدرێژکردنەسەر ئێران و سەرجەم وڵاتانی دیکەی دراوسێی".
شەوی 26ـى تشرینی یەکەمی 2024، فڕۆکە جەنگییەکانی ئیسرائیل، بۆ هێرشکردنەسەر ئێران، ئاسمانی عێراقیان بەکارهێنا.
پێشتر بەکارهێنانى ئاسمانى عێراق لەلایەن ئیسرائیلەوە بۆ هێرشکردنە سەر ئێران، کاردانەوەى هێز و لایەنە سیاسییەکانى عێراقى لێکەوتەوە و هەوڵ هەبوو لەو بارەیەوە وەزیرى بەرگرى و فەرماندەى ئۆپراسیۆنە هاوبەشەکان بانگهێشتى ئەنجوومەنى نوێنەران بکرێن.
