بافڵ جەلال تاڵەبانی و ڤۆڵکەر پێرسس توێژەری سیاسیی و دۆستی کورد لە ئەڵمانیا کۆبوونەوە
بافڵ جەلال تاڵەبانی، سەرۆکی یەکێتیی نیشتمانیی کوردستان لەگەڵ پرۆفیسۆر ڤۆڵکەر پێرسس، توێژەری باڵا لە پەیمانگەی کاروباری نێودەوڵەتیی ئەڵمانی و دۆستی کورد کۆبووەوە.
بەگوێرەى راگەیەندراوێکى نووسینگەى راگەیاندنى سەرۆکى یەکێتى، لە کۆبوونەوەکەدا، دەرباز کۆسرەت رەسوڵ، لێپرسراوی مەکتەبی پەیوەندییەکانی یەکێتى ئامادەبووە، بافڵ جەلال تاڵەبانی دوایین پێشهاتەکانی کوردستان و عێراقی بۆ پڕۆفیسۆر ڤۆڵکەر خستووەتەڕوو.
بافڵ جەلال تاڵەبانی لە کۆبوونەوەکەدا باسی لە رۆڵی ئەڵمانیا لە پاڵپشتیکردنی ئاسایش و سەقامگیریی ناوچەکە و تواناکانی بۆ هاوبەشیکردن لەگەڵ کوردستان بۆ گەشەپێدانی ئابووریی بۆ رەخساندنی خۆشگوزەرانیی و دەرفەت بۆ خەڵکەکەی کرد.
ڤۆڵکەر پێرسس، توێژەری باڵایە لە پەیمانگەی کاروباری نێودەوڵەتی و ئاسایش (SWP)، کە سەنتەرێکی پێشەنگی لێکۆڵینەوەی سیاسەتی دەرەوەی حکومەتی ئەڵمانیایە.
ڤۆڵکەر ساڵانێکی زۆرە دڵسۆزی دۆزی کوردە و بەردەوام سەردانی هەرێمى کوردستانی کردووە.