لیژنەی ئەمنیی سلێمانی رایگەیاند، هەندێک هەواڵی ناڕاست لەبارەی بڕیاری دەستبەسەرداگرتنی ئۆتۆمبێلە بێسەرەتاکان بڵاوکراونەتەوە، گوایە ئەو بڕیارە هەموو ئۆتۆمبێلێکی بێسەرەتا ناگرێتەوە، بە هەموو لایەنێک رادەگەیەنین بەهیچ جۆرێک گۆڕانکاریی و پاشگەزبوونەوە لە بڕیارەکە نەکراوە.
لیژنەی ئەمنیی سلێمانی لە راگەیەندراوێکدا بڵاویکردەوە، لە چەند میدیایەک ھەواڵێکی ناڕاست، بەمەبەست و چەواشەکارانە بڵاوکراوەتەوە کە گۆڕانکاری لە بڕیاری دەستبەسەرداگرتن و قەدەغەکردنی ئۆتۆمبێلە بێسەرەتاکان کراوە، یاخود بڕیارەکە گۆرانکاری بەسەردا ھاتووە و ھەموو جۆرە ئۆتۆمبێلێکی بێسەرەتا ناگرێتەوە.
لە راگەیەندراوەکە ئاماژەبەوەشکراوە، بە هەموو لایەک رادەگەینن، ئەم ھەواڵە دوورە لە راستییەوە و بەھیچ جۆرێک ھیچ پاشگەزبوونەوە و گۆرانکاری بەسەر بڕیاری دەستبەسەرداگرتنی ئۆتۆمبێلە بێسەرەتاکان نەھاتووە، چونکە بڕیارێکی سەرپێیی نەبووە و زۆر بە وردی توێژینەوەی بۆ کراوە و کۆدەنگی و ھەماھەنگیی سەرجەم لایەنە پەیوەندیدارەکانی لەسەرە.
لیژنەی ئەمنیی سلێمانی باسی لەوەشکردووە، بەتەواوی نیازمانە کۆتایی بە پاشاگەردانی، یاساشکێنی، شێواندنی سیمای شارستانی و ئارامیی شاری سلێمانی بهێنین، زۆر رشد و سوورین لەسەر جێبەجێکردنی ھەر بڕیارێک کە بڕیاری لەبارەوە دەدەین .
