پێشانگەی وەبەرهێنانى خانووبەرە و کەرتی بیناسازی بەبەشدارى نزیکەى 140 کۆمپانیای ناوخۆیی و بیانی لە سلێمانی دەستیپێکرد، جێگری پارێزگاری سلێمانی بە کەناڵ8ـى راگەیاند، پێشانگەکە تەواوکەرى ئەو پێشانگەیانەى دیکەیە، کە پێشتر بەمەبەستى ئاشنابوونى کۆمپانیاکان بە سلێمانى و پێشخستنى کەرتى وەبەرهێنان رێکخرابوون.

شاهۆ عوسمان، ئاماژەى بەوەشکرد، ئەوان توانیویانە کەشێکى ئارام و ئازاد دروستبکەن بۆ ئەوەى کۆمپانیاکان روو لە سلێمانى بکەن و لە چەند ساڵى رابردووشدا پارێزگاکە لە بوارى وەبەرهێنان گەشەیەکى بەرچاوى بەخۆیەوە بینیوە، جەختیلەوەشکردەوە، لە داهاتوویەکى نزیکدا پێشکەوتنى گەورەتر لە سلێمانى دەبینرێت.

نەوزاد غەفور، سەرۆکی ژووری بازرگانی و پیشەسازیی سلێمانی، لە پێشانگەی وەبەرهێنانى خانووبەرە و کەرتی بیناسازی لە سلێمانی، بە کەناڵ8ى راگەیاند، سلێمانى لە کەرتى وەبەرهێناندا بەتایبەت لە پیشەسازى و نیشتەجێبووندا پێشکەوتووە و لە زۆرێک لە سێکتەرەکاندا لە سەر ئاستى هەرێمى کوردستان و عێراق پێشەنگە.

نەوزاد غەفور، ئاماژەى بەوەشکرد، ئامانجى پێشانگەی وەبەرهێنانى خانووبەرە و کەرتی بیناسازی لە سلێمانی بەرزکردنەوەى جۆر و کولێتى پرۆژەکانە.

مستەفا عەبدولڕەحمان، سەرۆکى یەکێتیى هاوردە و هەناردەکارانی هەرێمی کوردستان، لە پێشانگەی وەبەرهێنانى خانووبەرە و کەرتی بیناسازی لە سلێمانی، بە کەناڵ8ى راگەیاند، زیاتر لە 20%ى کارگەکانى پیشەسازى لەسەر ئاستى عێراق لە سلێمانى هەیە.

گوتیشى، لە سلێمانى بڕێکى زۆر لە شیش و چیمەنتۆ بەرهەمدەهێندرێت و هەناردەى شارەکانى عێراقى دەکەن و دەشتوانن پێداویستى عێراق لە چیمەنتۆ پڕبکەنەوە.

مستەفا عەبدولڕەحمان ئاماژەى بەوەشکرد، کار بۆ ئەوە دەکرێت شیش و چیمەنتۆ لە سلێمانییەوە هەناردەى سووریا بکرێت.