ئەمریکا پرۆسەى چۆڵکردنى باڵیۆزخانەکەى لە بەغداد دەستپێکرد، بەگوێرەى سەرچاوە ئەمنییەکان، ئەمڕۆ فڕۆکە سەربازییەکانى ئەمریکا لە بنکەی سەربازیى ڤیکتۆریا لە نزیک فڕۆکەخانەى بەغداد نیشتوونەتەوە بۆ گواستنەوەى دیپلۆماتکاران و کارمەندانى باڵیۆزخانەکە.

سەرچاوەیەکى ئەمنیی عێراقى، بە رۆژنامەى شەرقلئەوسەتى راگەیاندووە، هاوکات لەگەڵ هۆشدارییەکان بارەى پەرەسەندنە ئەمنییەکانى رۆژهەڵاتى ناوەڕاست، ئەمریکا پرۆسەى چۆڵکردنى باڵیۆزخانەکەى لە بەغداد دەستپێکردووە و ئەمڕۆ فڕۆکە سەربازییەکانى ئەمریکا لە بنکەى سەربازیى ڤیکتۆریا کە هێزەکانى ئەمریکا و هاوپەیمانانى تێدا جێگرە نیشتوونەتەوە بۆ گواستنەوەى دیپلۆماتکار و کارمەندانى باڵیۆزخانەى ئەمریکا لە بەغداد.

هاوکات، ستیڤن ڤاگن، گوتەبێژى باڵیۆزخانەى ئەمریکا لە بەغداد رایگەیاندووە، گواستنەوەى کارمەند و دیپلۆماتکارانیان کونسوڵخانەى هەولێریش دەگرێتەوە، گواستنەوەکەش ئارەزوومەندانە نییە و کارمەندان ناچارن بەپەلە عێراق جێبهێڵن، بەبێ ئەوەى ژمارەکەیان ئاشکرا بکات.

وەزارەتى دەرەوەى ئەمریکا، ئاستى مەترسییەکانى لە عێراق بۆ پلەى چوار بەرزکردووەتەوە و داواى لە هاوڵاتییانى کردووە سەردانى عێراق نەکەن، بەهۆى بوونى مەترسى تیرۆر و رفاندن و توندوتیژى چەکدارى گرووپەکانى نەیارى ئەمریکا.