کۆمپانیای گشتیی بازرگانیی دانەوێڵەی عێراق رایگەیاند، تاوەکو ئێستا زیاتر لە چوار ملیۆن تۆن گەنم لە جوتیاران وەرگیراوە، دەشڵێت، پرۆسەی وەرگرتنی گەنم لە هەرێمی کوردستان و چوار پارێزگای دیکەی عێراق بەردەوامە.

حەیدەر گەرعاوی، بەڕێوەبەرى گشتیی کۆمپانیای گشتیی بازرگانیی دانەوێڵە بە ئاژانسی هەواڵی عێراقی گوتووە، تاوەکو ئێستا چوار ملیۆن و 100 هەزار تۆن گەنم لە جوتیاران وەرگیراوە و پێشبینیشدەکات، بڕەکە بگاتە چوار ملیۆن و 700 هەزار تۆن.

گوتیشی، "ئەو بڕە گەنمەی بەردەسته، پێویستییەکانی ناوخۆی عێراق پڕدەکاتەوە و گەیشتووەتە ئاستی خۆبژێوی".

بەگوتەی حەیدەر گەرعاوی، پرۆسەی وەرگرتنی گەنم لە پارێزگاکانی هەرێمی کوردستان و کەرکوک و سێ پارێزگای دیکەی عێراق بەردەوامە.

لەلایەکی دیکەوە کۆمپانیای گشتیی بازرگانیی دانەوێڵەی عێراق رایگەیاند، سەرەڕای ئەو بڕە گەنمەی وەرگیراوە، ملیۆنێک و 700 هەزار تۆن گەنمی ساڵی رابردووش ماوەتەوە.

کۆمپانیاکە هاوڵاتییان دڵنیادەکاتەوە ئارد و گەنم بۆ هاوڵاتییانی عێراق بەردەستدەبن، بێ گوێدانە ئەو بارودۆخەی هاتووەتە ئاراوە.