کەشناسیی عێراق، پێشبینی دەکات ئەمڕۆ و سبەى پلەکانی گەرما لە شارەکانی خوارووی عێراق نزیکبێتەوە لە 50 پلەی سەدی، کەشناسیی هەرێمی کوردستانیش دەڵێت؛ تۆزێکی سووک لە هەوادا بوونی دەبێت، نزمترین پلە لە سۆران و بەرزترین پلە لە گەرمیانە، کە 44 پلەیە.

کەشناسیی عێراق دەڵێت، "ناوچەکە کاریگەر دەبێت بە بارستە هەوایەکی گەرم و ناوچەکانی باشووری وڵات زۆرترین کاریگەریی لەسەر دەبێت".

بەگوێرەى کەشناسى، ئەمڕۆ پلەکانی گەرما لە بەسڕە، ناسرییە، موسەننا و میسان، نەجەف و دیوانییە، نزیک دەبێتەوە لە 50 پلە، لە بەغداد، واست، کەربەلا، سەڵاحەدین و دیالەش پلەکانى گەرما لەنێوان  47 و 48 پلە دەبێت.

کەشناسیى عێراق، پێشبینى کردووە، ئەم شەپۆلەی گەرمایە تاوەکو ئێوارەی سبەی دووشەممە 30ی حوزەیران، بەردەوام بێت و دوای ئەوە پلەکان نزم دەبنەوە و دەگاتەوە 44 و 46، لە ناوچەکانی هەرێمی کوردستانیش کەشێکی نیمچە بەهارەی دەبێت کە 37 بۆ 41 پلە دەبێت.

هاوکات بەشی پێشبینی لە وەزارەتی گواستنەوە و گەیاندنی هەرێمی کوردستان لە راگەیەندراوێکیدا لەبارەی کەشەوە دەڵێت؛ ئاسمان ساماڵە و توزێکی سووک لە هەوا بوونی دەبێت، پلەکانی گەرماش لە سۆران نزمترینە، کە 38 پلەی سەدییە و لە گەرمیان بەرزترین پلەی گەرمی دەبێت کە 44 پلەی سەدییە.