وەزارەتی تەندروستیی عێراق رایگەیاند، تەنیا هەفتەی رابردوو 17 حاڵەتی نوێی تای خوێنبەربوون تۆمارکراون و دوو کەسیان گیانیان لەدەستداوە.

سەیف بەدر، گوتەبێژی وەزارەتی تەندروستیی عێراق ئاشکرایکردووە؛ هەفتەی رابردوو لە تەواوی عێراق 17 حاڵەتی نوێی تووشبوون بە تای خوێنبەربوون تۆمارکراوە، لەو ژمارەیەش دوو کەسیان لە نەجەف و دیالە گیانیان لەدەستداوە.

بەگوێرەی دوایين ئامارەکانی تەندروستیی عێراق، لە ئەمساڵدا 184 کەس تووشی تای خوێنبەربوون بوون و 24 حاڵەتی گیانلەدەستدانیش بەهۆی پەتاکەوە تۆمارکراون و بەرزترین رێژەی تووشبووانیش لە پارێزگای زیقارە کە 60 کەس تووشبوون، بەڵام تەنیا یەک حاڵەتی مردن لەو پارێزگایە تۆمارکراوە.

لە پلەی دووەمدا بەغداد دێت بە 29 تووشبوو و شەش حاڵەتی گیانلەدەستدان، پاشان واست بە 17 حاڵەتی تووشبوو و یەک حاڵەتی گیانلەدەستدان پاشان پارێزگاکانی دیکەی عێراق دێن.

هەرچی پارێزگاکانی هەرێمی کوردستانە، لە هەولێر دوو تووشبووی تای خوێنبەربوون تۆمارکراوە، لە دهۆک سێ حاڵەتی تووشبوو و یەک حاڵەتی مردن تۆمارکراوە و لە پارێزگای سلێمانیش دوو حاڵەتی تووشبوون تۆمارکراوە.

لە کەرکوکیش لە کۆی پێنج حاڵەتی تووشبوون چوار کەسیان گیانیان لەدەستداوە.