بەڕێوەبەرایەتیى رێکخستنى پسوڵەى خۆراکى هەولێر، رایگەیاند، ئەو خێزان و هاوسەرانی جیابوونەتەوە و ناویان لە ئەپڵیکەیشنی پسوڵەی خۆراک سڕاوەتەوە سەردانیان بکەن بۆ چارەسەرکردنی کێشەکانیان.

ئەمڕۆ شەممە، 5ى تەمموزى 2025، بەڕێوەبەرایەتیى رێکخستنى پسوڵەى خۆراکى پارێزگاى هەولێر، راگەیەندراوێکى بڵاوکردەوە و تیایدا ئاماژەى بەوەکردووە، ئەو خێزانانەی جیابونەتەوە و (تەڵاقنامە)یان هەیە بەڵام لەبەر هەر هۆکارێک بێت لە ئەپڵیکەیشنەکە یەکێکیان ناوی بلۆک کراوە، جا چ ژنەکە بێت یاخود پیاوەکە، لەم حاڵەتەدا پێویستە ئەو کەسەی ناوی سڕاوەتەوە سەردانی بەڕێوەبەرایەتیەکەیان بکات بۆ ئەوەی فۆڕمی تایبەت بە کێشەی خێزانیان بۆ پڕبکەنەوە و رەوانەی بەغدادی بکەن، تاوەکو بەشە خۆراکیان نەفەوتێ و ناویان داخڵی سیستمی نوێکردنەوەی بەشە خۆراک بکرێت.

بە گوێرەى زانیارییەکانى پسوڵەى خۆراکى هەولێر، تاوەکو کۆتایی مانگی رابردوو، لە ملیۆنێک و 984 هەزار خێزان لە پارێزگای هەولێر ملیۆنێک و 400 هەزار خێزان فۆڕمی ئەلیکترۆنیانى بەشەخۆراکیان پڕکردووەتەوە.