لە لێدوانێکیدا بۆ کەناڵ8، د. هونەر عوسمان کەریم، پزیشکی پسپۆڕی نەخۆشییەکانی منداڵان، باسی لە زیانەکانی پاسکیلی کارەبایی بۆ تەندروستی و گەشەی منداڵانکرد .

پزیشکەکە سەرەتا باسی لەوە کرد کە ئێستا دایکوباوکان بە شێوازێکی بەرچاو پاسکیلی کارەبایی بۆ منداڵەکانیان دەکڕن، بەڵام بەکارهێنانی ئەم پاسکیلانە وادەکات جوڵە و چالاکییەکانی منداڵان کەمببێتەوە، بەمەش چەندین گرفتی تەندروستییان بۆ دروستدەبێت.

گەورەترین ئەو گرفتانەی ئەم پاسکیلە کارەباییانە دروستیاندەکات بریتینلە قەڵەوی و تێکچوونی هۆرمۆنەکان، ئەمانەش گرفت بۆ گەشە و تەندروستیی منداڵان دروستدەکەن.

بە گشتی ئەو منداڵانەی جوڵەی سروشتییان زۆرە، بۆ نمونە ئەو منداڵانەی زیاتر رادەکەن، یاریی دووگۆڵی دەکەن یان پاسکیلی ئاسایی لێدەخوڕن، گەشەیان باشترە، باڵایان بەرزترە و کێشی جەستەشیان تەندروستترە بەراورد بەو منداڵانەی شاشەکان و پاسکیلە کارەباییەکان زیاتر بەکاردەهێنن.

پزیشکەکە رێنمایی دایکوباوکانی کرد کە لە جیاتی پاسکیلی کارەبایی، باشترە پاسکیلی ئاسایی بۆ منداڵ بکڕرێت، ئەمەش بۆئەوەی بە چالاکی بمێننەوە و دووربن لە قەڵەوی و گرفتە تەندروستییەکانی داهاتوو.

"لەڕووی زیانەکانییەوە بەکارهێنانی پاسکیلە کارەباییەکان هیچی کەمتر نییە لە بەکارهێنانی شاشە و ئامێرەکان".