ئەو دەرزییەی بە شێوازێکی باو بۆ چارەسەری سەوەفانی ئەژنۆ بەکاردەهێنرێت، بە دەرزیی لینجیی ئەژنۆ ناسراوە، بەڵام ناوە زانستییەکەی بریتییەلە دەرزیی ترشی هایالیورۆنیک.

لە بڵاوکراوەیەکدا، د. کرمانج محەمەد هادی، پسپۆڕی جومگە و رۆماتیزم، باسی لە بەکارهێنانەکانی ئەم دەرزییە کردووە و سوودەکانی خستووەتەڕوو.

ئەم دەرزییە بەتایبەتی لەو کەسانەدا کاریگەرترە کە سەوەفانێکی کەم بۆ مامناوەندیان هەیە و سوودیان لە چارەسەرەکانی دیکە نەبینیوە وەکو دابەزاندنی کێش، دەرمان و چارەسەری سروشتی.

ئەم دەرزییە چۆن کاردەکات؟

بە شێوازێکی سروشتی هەموو مرۆڤێک ترشی هایالیورۆنیک لە شلەی جومگەکانیاندا هەیە، ئەم ترشە وەکو چەورکەرێک کاردەکات و پەستانی سەر جومگەکان کەمدەکاتەوە.

لەو کەسانەی کە تووشی سەوەفان دەبن، بڕی ئەم ترشە لە شلەی جومگەکانیاندا کەمدەبێتەوە، ئەمەش دەبێتەهۆی ئازار، رەقبوون و سنوورداربوونی جوڵە.

بەم دەرزییە، ترشی هایالیورۆنیکی دەستکرد دەکرێتە ناو جومگەی ئەژنۆ و دەتوانێت لینجیی ئەژنۆ بگەڕێنێتەوە و هەوکردن و ئازاری کەسەکە کەمبکاتەوە.

کاریگەرییەکانی ئەم دەرزییە:

• کەمکردنەوەی ئازار و باشترکردنی کارکردنی جومگەکان لانیکەم بۆ ماوەی سێ بۆ شەش مانگ
• کاریگەریی دەرزییەکە لە کەسێکەوە بۆ کەسێکی دیکە جیاوازە، ئەو کەسانەی سەوەفانی توندیان هەیە کەمتر سوود لەم چارەسەرە وەردەگرن
• لەگەڵ ئەوەی ئەم چارەسەرە بە شێوازێکی هەمیشەیی گرفتەکە چارەسەر ناکات، بەڵام پێویستیی نەشتەرگەریی گۆڕینی ئەژنۆ دوادەخات

کاریگەرییە لاوەکییەکانی دەرزیی ترشی هایالیورۆنیک

لەوانەیە ئەو کەسەی ئەم دەرزییەی بۆ بەکاردەهێنرێت، تووشی ئاوسان و ئازارێکی کەم و رەقبوونی شوێنی دەرزییەکە ببێت، لە هەندێک حاڵەتی دەگمەنیشدا دەکرێت کەسەکە تووشی هەوکردن یان کاردانەوەی هەستەوەریی ببێت.