وادەی وەرگرتنی گەنمی جوتیاران تەنیا چوار رۆژی ماوە، تاوەکو ئێستا 295 هەزار تۆن گەنم لە جوتیاران وەرگیراوە و بەغداد هیچ بڕە پارەیەکیشی بۆ گەنمى بۆ جوتیاران نەناردووە.

نەوزاد شێخ کامیل، بەڕێوەبەرى گشتیى بازرگانى لە وەزارەتى بازرگانى و پیشەسازیى حکومەتى هەرێمى کوردستان بە کەناڵ8ـى راگەیاند، "لە رۆژى 10ـى حوزەیران دەست بەوەرگرتنى گەنمى جوتیاران کراوە و وادەکە تاوەکو 10ـى تەمموزە، بەڵام داوایانکردووە چەند رۆژێکیان بۆ درێژبکرێتەوە و هەوڵەکانیان بەردەوامە، بەڵام تاوەکو ئێستا رەزامەندى لەسەر نەدراوە".

راشیگەیاند، تاوەکو ئێستا بڕى 295 هەزارو 435 تۆن گەنم لە جوتیارانى هەرێمى کوردستان وەرگیراوە، بەشێوەیەک لە پارێزگاى هەولێر 88 هەزار و 343 تۆن و 845 کیلۆگرام، لە پارێزگاى دهۆک 87 هەزارو 664 تۆن و 140 کیلۆگرام، لە پارێزگاى سلێمانى 119 هەزارو 427 تۆن و 950 کیلۆگرام لەجوتیاران وەرگیراوە.

وەزارەتی بازرگانی عێراق بڕیاریداوە، ئەمساڵ 400 هەزار تۆنی گەنمی جوتیارانی هەرێمی کوردستان وەربگرێت.

بەڕێوەبەرى گشتیى بازرگانى لە وەزارەتى بازرگانى و پیشەسازى حکومەتى هەرێمى کوردستان ئەوەشى خستەڕوو، "تاوەکو ئێستا بەغداد هیچ بڕە پارەیەکى بۆ جوتیارانى هەرێمى کوردستان رەوانە نەکردووە".

ئەوە لەکاتێکدایە، وەزارەتى دارایی عێراق بە سێ گوژمەى جیاواز، بڕى یەک تریلیۆن و 500 ملیار دینار بۆ شایستەى دارایی گەنمى جوتیاران خستووەتەسەر هەژمارى دارایى وەزارەتى بازرگانى عێراق، کە جوتیارانى باشوورى عێراق و بەشێک لە ناوەڕاست، پارەى گەنمى ئەمساڵیان وەرگرتووە.