ئاژانسی پەنابەرانی سەربە نەتەوەیەکگرتووەکان، UNHCR، لە راگەیەندراوێکدا، پێشوازی لە بڕیارێکی حکومەتی هەرێمی کوردستان کرد بە پێدانی 60 رۆژی دیکە وەک مۆڵەت بۆ رێکخستنی کارە یاساییەکانی ئاوارە و پەنابەرانی سووریا لە هەرێمی کوردستان.

ئاژانسەکە لە راگەیەندراوێکدا ئاماژە بۆ ئەوە دەکات، پێزانینیان بۆ بڕیارەکەی هەرێمى کوردستان هەیە کە کارئاسانی بۆ مانەوەی یاسایی ئاوارە و پەنابەرانی سووریا بەبێ هیچ سزایەک دەکات.

باسی لەوەش کردووە، بڕیارەکەی حکومەتی هەرێمی کوردستان لە 15ـی حوزەیرانەوە دەرچووە و بەهۆیەوە رێگە بە دەیان خێزان و هاوڵاتیی دیکەی سووریا دەدرێت کە کێشەی ناسنامە و ڤیزای مانەوەیان هەیە، لە کوردستان بمێننەوە، بەوەش ئەو خێزانانەی کێشەی گەڕانەوەیان بۆ دروستبووە، کارئاسانییان بۆ دەکرێت.

بەگوێرەی زانیارییەکانی ئاژانسی پەنابەران، لەسەرەتای ئەمساڵەوە، دوو هەزار و 500 ئاوارە و پەنابەری سووریا ناوی خۆیان بۆ گەڕانەوە تۆمارکردووە، بەڵام ژمارەیەکیان کێشەیان بۆ دروستبووە.

لە کۆتایی راگەیەندراوەکەدا، ئاژانسی پەنابەرانى نەتەوەیەکگرتووەکان دەڵێت، پشتیوانیی حکومەتی هەرێمى کوردستان دەکەن بۆ جێبەجێکردنی بڕیارەکە و لەپەیوەندیشدا دەبن بۆ ئاسانکاریی زیاتر.