نەخۆشییەکانی دڵ لە منداڵاندا، بەپێی تەمەن و جۆری نەخۆشییەکە و توندییەکەی، نیشانەی جیاوازیان هەیە، گرفتەکانی تەندروستیی دڵ لە هەندێک منداڵاندا هیچ نیشانەیەکی ئەوتۆی نییە و زۆرجار دایک و باوک ئاگاداری کێشەکانی دڵی منداڵەکەیان نین .

نیشانەکانی بوونی گرفت لە دڵی منداڵاندا چین؟

هەندێکجار نیشانەکانی بوونی گرفت لە دڵی منداڵاندا لە چەند هەفتەی سەرەتای لەدایکبوونی منداڵدا دەردەکەون و بەهۆی کەمیی ئۆکسجین لە جەستەی منداڵەکەدا دروست دەبن، نیشانە باوەکانی بوونی گرفت لە دڵی منداڵاندا بریتین لە:

1. ماندوێتی و بێهێزی
2. ڕەنگی لێو و پێستی منداڵەکە شین دەبێت
3. ئاوسانی قاچ، سک، یان ناوچەکانی دەوروبەری چاو
4. هەناسەتووندی
5. کەمیی گەشەی منداڵەکە
6. زەردبوونی پێست

بە گشتی نیشانەکانی بوونی نەخۆشیی دڵ لە منداڵانی گەورەتر و هەرزەکاراندا بریتین لە:

1. کەمیی جوڵە و کەمیی توانا بۆ یاریکردن لەگەڵ منداڵانی دیکە
2. هەناسەتووندیی
3. ئارەقکردنەوە
4. شینبوونی چواردەوری پووک، زمان و پێست
5. ئازاری سنگ لە کاتی ئەنجامدانی چالاکیدا
6. لەهۆشخۆچوون
7. ناڕێکیی لێدانی دڵ
8. سەرگێژخواردن لە کاتی وەرزشکردندا

د.بیلال عەبدوڵڵا

پزیشکی پسپۆڕی نەخۆشییەکانی منداڵان