قوباد تاڵەبانى، جێگرى سەرۆکوەزیرانى هەرێمى کوردستان بە باشى زانى لە بوارەکانى کشتوکاڵ، گەشتوگوزار و کولتووریدا ئیسپانیا  و هەرێمى کوردستان و عێراق پەیوەندییەکانیان بەرەو پێش بەرن.

پێویستی پەرەپێدانی پەیوەندییەکان

ئەمڕۆ سێشەممە، قوباد تاڵەبانى، لەگەڵ ڕیکۆ پێرێز، باڵیۆزى ئیسپانیا لە عێراق کۆبووەوە و باسیان لە پێویستى پەرەپێدانى پەیوەندییەکانى نێوان هەرێمى کوردستان و ئیسپانیا کرد.گ

گەشەپێدانی پەیوەندییەکان لە بوارەکانی کشتوکاڵ و گەشتوگوزاردا

بەگوێرەى ڕاگەیێندراوى کۆبوونەوەکە، هەردوولا هاوڕابوون دەرفەتى گونجاو هەیە بۆ ئەوەى بەتایبەت لە بوارەکانى کشتوکاڵ، گەشتوگوزار و کولتووریدا، ئاستى پەیوەندییەکان پتەوتر بکرێت.

گەشەپێدانی ئابووری و باشترکردنی ژیانی هاوڵاتیان لە عێراق

لە تەوەرێکی دیکەدا، گفتوگۆ لە بارەی پەیوەندییەکانی نێوان هەرێمى کوردستان و بەغداد کرا. لەمبارەیەوە هەردوولا هاوڕابوون حکومەتی نوێی عێراق دەبێت گرنگی بە گەشەپێدانی ئابووری بدات و لەم چوارچێوەیەشدا هەردوو حکومەتی عێراق و حکومەتی هەرێم پێکەوە هەماهەنگ و هاوکار بن، بە جۆرێک هاوکات لەگەڵ چارەسەرکردنی کێشەکانی نێوانیان پێکەوە کار بکەن بۆ گەشەپێدانی ئابووری و باشترکردنی ژیان و گوزەرانی هاوڵاتییان.

کۆتایی هێنان بە شەڕ و ئاڵۆزییەکان

لە بەشێکی دیکەی کۆبوونەوەکە، هەردوولا هاوڕابوون وڵاتانی ناوچەکە و کۆمەڵگەی نێودەوڵەتی دەبێت هاوکار بن بۆ کۆتاییهێنان بە شەڕ و ئاڵۆزییەکان و گەیشتن بە ڕێککەوتنێک کە ئاشتی و سەقامگیری لێبکەوێتەوە.