بەگوێرەى ئەنجامی دوایین راپرسی، دوو لەسەر سێی دیموکراتەکانی داوای کشانەوەی جۆ بایدن لە کێبڕکێ بۆ هەڵبژاردنی سەرۆکایەتیی ئەمریکا دەکەن.

راپرسییەکە لەلایەن سەنتەری "AP-NORC"ەوە ئەنجامدراوە و بۆ پێش رووداوی تەقەکردن لە دۆناڵد ترەمپ دەگەڕێتەوە، بەگوێرەى ئەنجامی راپرسییەکە، 65%ـى دیموکراتەکان بەپێویستی دەزانن بایدن بکشێتەوە.

بەشێوەیەکی گشتی حەوت کەس لە کۆی 10 کەسی پێگەیشتووی دیموکراتەکان، بۆچوونیان وایە پێویستە بایدن پێشبڕکێی هەڵبژاردنەکان جێبهێڵێت و هەر بەگوێرەى راپرسییەکە 50%ـى دیموکراتەکان، دڵنیانین لەوەی توانا هزرییەکانی بایدن رێگە دەدات کارەکانی وەکو سەرۆکی ئەمریکا رابپەڕێنێت.

جۆ بایدنی 81 ساڵ، بەربژێری دیموکراتەکانە بۆ هەڵبژاردنی سەرۆکایەتیی ئەمریکا، بەڵام بەهۆى تێکەڵکردنی وشە و لەبیرکردنی ناوی سەرۆک و سەرکردەکانی جیهان و هەڵەی زمانەوانی، تووشی رەخنەی گەورە بووەتەوە.