بەرەبەیانی ئەمڕۆ شەممە، لە هەرێمى بەلوچستانی پاکستان تەقینەوەیەک روویدا و بەهۆیەوە 22 کەس گیانیانلەدەستداوە و 46 کەسی دیکەش برینداربوون.

گوتەبێژێک بەناوی حکومەتی پاکستان بە ئاژانسی ئەسۆشیەيتد پرێسی راگەیاندووە، تەقینەوەکە لە وێستگەی شەمەندەفەری کویتا لەناوەندی پایتەختی هەرێمى بەلوچستان روویداوە، پێدەچێت ژمارەی کوژراو و بریندارەکان زیاتر بن لەو ژمارەیەی نەخۆشخانەکان ئاشکرایان کردووە.

بەگوێرەی زانیارییەکانی حکومەتی پاکستان، بەدیاریکراوی تەقینەوەکە کاتژمێر 8:45 خولەک روویداوە و زیاتر ئەو سەرنشینانەی کردووەتە ئامانج کە لە چاوەڕوانیی سەرکەوتندا بوون.

بەلوچستان، گەورەترین و هەژارترین هەرێمی پاکستانە و دەکەوێتە سنوورەکانی ئەفغانستان و ئێران، زۆربەی گرووپە یاخییەکانیش لە دەوروبەری ئەو ناوچەیەن.