بەردی بۆریی میز لە ئەنجامی دابەزینی بەردی حەوزی گورچیلەوە دروستدەبێت، کە دادەبەزێت و دەخزێتە ناو بۆریی میز.

کاتێک بەرد دادەبەزێت بۆ ناو بۆریی میز دەبێتەهۆی ئازارێکی زۆر، نەخۆش لە تاو ئازار شوێن بەخۆی ناگرێت، هەروەها هەندێجار بەردەکە دەبێتەهۆی روشانی ناوبۆشی میزەڕۆ و میزەکە خوێناوی دەکات.

هەندێجار کاتیک بۆریی میز بەتەواوی دەگیرێت بەهۆی بەردەوە دەبێتەهۆی پەنگخواردنەوەی میز و کشانی بۆریی میز و ئاوسانی گورچیلەکان.

هەندێجار هەوکردن روودەدات. دوای دابەزینی بەرد بۆ ناو بۆریی میز نەخۆش هەست بە لەرز و تاو و دەم وشکبوون دەکات. هەروەها نەخۆش بەهۆی ئازاری زۆر توشی رشانەوە دەبێت، ئارەزووی خواردن و خواردنەوەی نابێت ئەمەش زیاتر دەبێتەهۆی وشکبوونی نەخۆش و کەمبوونەوەی شلەی لەش.

چۆن بەردی بۆریی میز دەستنیشان دەکرێت؟

• پشکنینی میز کە خوێن و کریستاڵی تێدایە یان ئەو خانەنای تێدایە کە ئاماژەن بۆ هەوکردن
• بەهۆی نیشانەکانیەوە ئازار و سووربوونی میز و رشانەوە، یان نەخۆش پێشینەی بەردی حەوزی گورچیلەی هەیە بەمەش گومان دەکرێت کە دایببەزێنێت
• رێگەیەکی دیکە بۆ دەستنیشانکردنی بەردی بۆریی میز بریتییەلە سۆناری گورچیلەکان و بۆریی میز
• تیشکی ئاسایی گورچیلەکان یان تیشکی تەنوری )ئەشیعەی ئاسای یان تەنوری)
•  

‌چارەسەری بەردی بۆریی میز

• ئازارشکێن
• دەرمانی دژەڕشانەوە ئەگەر نەخۆش رشانەوەی هەبوو
• پێدانی موغەزی لەڕێگەی کانولاوە
• دژەهەوکردن ئەگەر نیشانەکانی هەوکردنی هەبوو

کێ دوای دابەزینی بەرد دەبێت لە نەخۆشخانە بمێنێتەوە؟

• ئەو کەسانەی یەک گورچیلەیان هەیە
• ئەو کەسانەی لە هەمان کاتدا بەرد دادەبەزێتە ناو بۆریی میزی راست و چەپیان
• ئەو کەسانەی لاوازیی ئیشکردنی گورچیلەیان هەیە
• ئەو کەسانەی هەوکردن و رشانەوەیان هەیە یان ئازارەکەیان بە ئازارشکێن ناشكێت
• ئەو کەسانەی گوچیلەیان بۆ چێنراوە و بەردی میزیان هەیە

چارەسەری بەردی بۆریی میز چیە؟

چادوێریکردن: چاودێریکردنی چارەخواز و پێدانی دەرمان کە یارمەتیدەرە بۆ فڕێدانی بەردی بۆریی میز بۆ ماوەی چوار هەفتە. بە مەرجێک چارەخواز هەوکردنی نەبێت یان ئازاری توندی نەبێت و بە ئازارشکێن ئازارەکەی بە ئاسانی کۆنترۆڵبکرێت، هەروەها تاک گورچیلە نەبێت و لاوازی ئیشکردنی گورچیلەی نەبێت.

نەشتەرگەری: رێگەیەکی دیکەی چارەسەری بەردی بۆریی میز بریتییەلە هەناوبینیی بۆریی میز و شکاندندی بەردی بۆریی میز

هەناوبینیی بۆریی میز دوو جۆرە:

• هەناوبینیی رەق (نەنوشتاوە)ـی بۆریی میز
• هەناوبینیی نەرمی بۆریی میز

د. هەردی تارق زەنگەنە

پسپۆڕی نەشتەرگەریی گورچیلە و میزەڕۆ و پرۆستات