Şêwirmendê Rêveberiya Xweser Bedran Çiya Kurd ragihand, li gorî rêkeftina ku bi hikûmeta Dîmeşqê re hatiye kirin, Rêveberiya Xweser statuya xwe ya biryardayînê winda nake û dê xwedî statuyeke taybet be.
Şêwirmendê Rêveberiya Xweseriya Demokratîk a Bakur û Rojhilatê Sûriyê Bedran Çiya Kurd di hevdîtinekê de bi Ajansa Nûçeyan a Mezopotamyayê re balkişande ser rêkeftina ku di navbera Mazlûm Abdî û Ehmed Şer’i de hatibû îmzekirin û da zanîn, bi rêkeftinê re, dê destkeftiyên gelê kurd bên parastin û di rojên pêş de jî komîteyên taybet dê bi Dîmeşqê re danûstandinan bikin û bi sererastkirinên yasayan re, destkeftî dê bên mayindekirin.
Çiya Kurd diyar kir, Herêma Bakur û Rojhilatê Sûriyê jî dê bibe xwedî statuyeke taybet û xweseriya xwe ya biryardayînê ya niha winda nake. Bakur û Rojhilatê Sûriyê ji aliyê hin hêzan ve rastî hewldanên reşkirina siyasî hatiye lê gotara reşkirinê bi vê peymanê re îflas kir.
Her wiha destnîşan kir ku herêmên Bakur û Rojhilatê Sûriyê parçeyeke girîng a Sûriyê ye û bêyî wê çareseriya aştiyane û demokratîk li Sûriyê pêk nayê.
