Li Efrîna Rojavayê Kurdistanê tevî Hêzên Ewlehiya Giştî yên girêdayî Dîmeşqê dosyeya ewlehiyê wergirtine, lê dizî zêde bûye û welatî dibêjin Dîmeşq nikare rewşê kontrol bike.

Welatiyekî ji Efrînê ji KANAL8’ê re ragihand, heta niha malbatên çekdaran di gelek malên welatiyên Efrînê de ne û dema xwdiyên malan daxwaza mala xwe dikin ew çekdar dibêjin ew mala wane û jê dernakevin.

Li gorî gotinên wî welatî, gelek caran mijar digihe gefxwarinê ku ew malbat pişta xwe bi çekdaran xort dikin.

Di heman demê de Rêxistina Mafê Mirovan ya Efrîn – Sûriyê destnîşan kir, malbatên çekdaran û çekdar bixwe jî diziyê dikin û li gundên Qasim, Tilif, Zerka, Kêla, Hesen Kilkawî û Hecîka dizî hatiye kirin û sivîlan ziyan dîtiye.