Komisyona Hevgirtina Neteweyî, Biratî û Demokrasiyê ji bo nîqaşkirina serdana Îmraliyê civiya. Numan Kurtulmuş di vekirinê de axivî û diyar kir ku pêvajoya raporê dest pê kiriye û got, "Bi amadekirina raporê re, ev pêvajoya dîrokî dê ji qonaxeke din a giring derbas bibe."

Komisyona Hevgirtina Neteweyî, Biratî û Demokrasiyê, ku di çarçoveya pêvajoya çareserkirina pirsgirêka Kurd de li Parlamentoyê hatiye damezrandin, ji bo hevdîtina bi rêberê PKKyê Abdullah Ocalan re û wergirtina pêşniyazên ji partiyên siyasî derbarê rêziknameyên qanûnî, civiya.

Civîn bi derengî dest pê kir ji ber ku Serokê Encûmena Mezin a Neteweyî ya Tirkiyeyê Numan Kurtulmuş berî civînê bi koordînatorên partiyên siyasî re civiyabû.

Numan Kurtulmuş di destpêka civînê de axivî û diyar kir ku xebata Komisyonê ketiye qonaxa xwe ya herî hestyar, krîtîk û nazik.

Numan Kurtulmuş got, "Ji niha û pê ve, em ê di qonaxên dawîn de erkê xwe yê bingehîn bi cih bînin û encamên wê pêşkêşî Komîteya Giştî ya Parlamentoyê bikin."

Kurtulmuş diyar kir ku “pêvajo bi tenê bi xebata Komisyonê ve sînordar nebû, lê di heman demê de heta niha bi rêya peywendiyên bi saziyên dewletê yên têkildar ve yên li ser erdê jî hatiye meşandin. Ev pêvajo, ku beşî wekî polîtîkayeke dewletê jî dihat meşandin, bi peywendiya bi hemî saziyên dewletê yên têkildar ên li ser erdê û bi awayekî, bi rêxistinê re giha vê astê. Ev pêvajo ne pêvajoyeke dan û standinê bû. Piştî ku rêxistinê biryara xwe ya hilweşandina xwe ragihand û pêvajoya radestkirina çekên xwe bi merasîmeke sembolîk dest pê kir, ev pêvajo leztir bû. Ji bo bicihanîna berpirsiyariyên xwe, siyasetê, bi hevpeymaniya 11 partiyên me yên di Parlamentoyê de, ev Komisyon ava kir û ew gihandiye roja îro.”

Kurtulmuş got ku: "Komisyon jî bi hilgirtina berpirsiyariyên xwe yên dîrokî vê pêvajoya dîrokî pêk tîne. Zelal e ku em ketine serdemeke pir hestyar ku divê em di paşerojê de hîn baldartir bin. Ez vê yekê wekî hişyariyeke giring ji bo me hemûyan, nemaze ji bo xwe, pêşkêş dikim. Ez dixwazim wisa bibêjim. Pêvajoyê heta niha di vî warî de 134 kes û rêxistin guhdar kiriye. Di civîna me ya 18em a herî dawî de, piraniya beşdaran biryarek da, ku hewce dike nûnerek ji her partiyekê di Komisyona me de ji bo çûna giravê hebe.

Sê partiyên siyasî endamên xwe şandin. Serdan di 24ê Mijdarê de pêk hat. Bi vê serdanê re, qonaxa guhdarîkirina Komisyonê bi dawî bû. Di qonaxa din de, em derbasî qonaxa raporê dibin. Bi vî awayî, bi amadekirina vê raporê, ev pêvajoya dîrokî dê qonaxeke din a giring derbas bike û berpirsiyariyên xwe bi cih bîne. Me berê ji partiyên bi komên li vir xwest ku raporên xwe amade bikin. Heta niha, min raporên ku ji hêla 5-6 kesan ve hatine amadekirin wergirtine. Em van hemûyan tomar dikin. Ji ber vê yekê, di rûniştina îro de, em ê pêşî guh bidin rapor û pêşniyazan, paşe  guh bidin kesên ku raporên wan amade ne.”

Numan Kurtulmuş bal kişand li ser hestyariya pêvajoyê û got: “Diyar e ku pêvajo çiqas hestyar bûye. Her peyvek ku tê gotin normal nayê hesbandin. Em dikevin serdemekê ku gotinên her kêliyê têne gotin, pir bandorker in, bandorê li mirovên di nav çemberên nediyar de dikin, hem bi erênî û hem jî bi neyînî. Wekî ku gotina kevin dibêje, "Ger axaftin zîv be, bêdengî zêr e," Divê her kes berî her peyvekê bi kar bîne, serdema hestar a vê pêvajoyê baş bibîne, bila em ji helwestên xwe yên siyasî dûr bisekine. Em hemû xwedî nêrîn û têgihîştinên siyasî yên cuda ne, lê dibe ku xaleke me ya hevpar hebe: bila çek li vî welatî bêdeng bin. Bila dayik negirîn, bila dil xemgîn nebin û bila paşeroja vê neteweyê negihe destên tarî. Ji ber vê yekê, ez ji her yekî ji we tika dikim ku hûn vê yekê wekî keyseke siyasî bikar neynin.”

Kurtulmuş hişyarî da çapemeniyê jî û got: “li vir berpirsiyariyeke mezin heye. Min ev hişyarî caricaran daye, lê pêwîst e. Rastiya pêvajoyê, kê çi got, ji ku derê hat, çû ku derê? Ya giringtir, çi encamên berbiçav hatine hilberandin? Ev e ya giring. Divê em hewleke jidil bikin da ku pêşî li trolkirina vê pêvajoyê bigirin. Wekî din, ziman; divê em li ton û tevgera xwe jî haydar bin. Ev mijar ne xema partiyekê yan çend kesan e. Ev mijar ji bo hemî Tirkiyeyê, ji bo 86 milyonan xem e.”

Kurtulmuş di dawiya axaftinên xwe de wiha got: “Dema ku ev mijar serkeftî bi dawî bibe, ne tenê yek an çend partî dê bi ser bikevin; hemû Tirkiye, tevî partiyên dijberî pêvajoyê, dê bi ser bikevin. Em ê vê berpirsiyariyê bidomînin, wekî ku me her gav kiriye. Em ê bi semax, van pêvajo û danûstandinan temam bikin da ku encameke erênî bi dest bixin. Em dizanin ku kesên çep û rast, ji hundir û derve hene ku ji bo têkbirina vê pirsgirêkê planan dikin. Em ê bi diyarkirina nakokiyên xwe ji hev re, rêya xwe bidomînin. Ez bawer im ku vê carê Tirkiye dê bi ser bikeve. Vê carê em ê bêguman bi ser bikevin.”

Piştî axaftina Kurtulmuş, pêşniyazên ji partiyên siyasî derbarê rapora ku ji bo rêziknameyên qanûnî were amadekirin dest pê kirin.

Piştî van pêşniyazan, serdana bi Abdullah Ocalan re dê di rojevê de be.