Balafirgeha Navneteweyî ya Hewlêrê îro danê sibehê rastî êrişeke mezin a bi dronan hat û ziyanên madî çêbûn.

Li gorî raporên destpêkê, heşt dron li balafirgehê hatine avêtin, lê berî ku bigihîjin armancên xwe ji aliyê pergala parastina asmanî ve hatine xistin.

Ziyanên madî yên êrişan

Dron li asman hatin teqandin û bermahiyên wan û beşên wan ketin nav çend taxên nêzîkî balafirgehê. Di encamê de, perçeyek dron li otomobîleke sivîl ket û agir pê ket, lê ti agahî li ser qurbaniyan nehat dayîn. Di heman demê de, li heman deverê du xanî zirar dîtin û perçeyek din a dron li qada dibistanekê ket.

Êriş li ser baregeha Pêşmergeyan

Berdevkê Dezgeha Asayîşê ya Herêma Kurdistanê ji KANAL8ê re got ku êriş îro sibê li ser baregeha hêzên Pêşmergeyên Kurdistanê hatine kirin. Li gorî wî, êrîş bi du mûşek û du dronan hatiye kirin.

Silêmanî; Armanckirina ofîseke berê ya Neteweyên Yekbûyî

Rewşa ewlehiyê ne tenê bi Hewlêrê ve sînordar e; Şeva bihurî li Silêmaniyê, êrişeke bi dronan li ser Girê Riayeyê ya berê wekî ofîsa Neteweyên Yekbûyî dihat bikaranîn û niha vala bûye, hat kirin.

Bombebarankirina baregehên Heşdî Şebî li Babil û Enbarê

Di heman demê de, Nûçegihanê KANAL8ê li Bexdayê got ku şeva bihurî çend deverên li parêzgehên Babil û Enbarê bi tundî hatin bombebarankirin. Lijneya Heşdî Şebî di daxuyaniyek fermî de piştrast kir ku Lîwaya 45emîn li Curf Sexr û Lîwaya 31emîn li parêzgeha Enbarê ji aliyê balafiran ve hatine hedefgirtin, lê got ku ti qurbanî çênebûne.