Tulay Hatîmogullariyê got, "Werin em qanûna ji bo pêvajoyê vê mehê derxin û bila di Cotmehê de bikeve meriyetê."

Hevseroka DEM Partiyê Tulay Hatîmogullari di civîna koma partiya xwe de axivî û bang li berpirsan kir ku di Tîrmehê de qanûnek çarçoveyî derxin û bila di destpêka rûniştina nû ya qanûndanînê ya di Cotmehê de bikeve meriyetê.

WÊ YASAYÊ DI MEHA TÎRMEHÊ DE DERXIN

Hevseroka Partiya Wekhevî û Demokrasiyê ya Gelan (DEM Partî) ji bo yasaya pêvajoyê bang li hikûmetê kir û got, “Di meha Tîrmehê de qanûna çarçoveyê derxînin. Gava ku di 1ê Cotmehê de parlamento vebû, em rêziknameyên ku dê vê qanûna bingehîn xurt bikin û rê li ber demokrasî û azadiyan vekin, yek bi yek bixin meriyetê.”

Hatîmogullariyê bal kişand li ser şêwazê cuda fikirandinê û wiha pê de çû: Dibe ku xalên ku em cuda difikirin hebin. Em dikarin van bi muzakere û aqilê hevpar pir baş çareser bikin. Tam li vir, werin em erk û berpirsiyariyên ku welatê me li ser milê saziya siyasetê ya giştî bar kiriye, bi cih bînin. Divê kes ji berpirsiyariya xwe nereve û kes di pozîsyona temaşevaniyê de nemîne.

ÇAR SERNAVÊN BINGEHÎN

Hatîmogullariyê da zanîn li gorî partiya wan çar sernavên bingehîn hene ku nikarin werin paşxistin û ev xal wiha rêz kirin

• Ya yekem, qanûneke bingehîn û berfireh. Divê hiqûqa aştiyê li ser bingehekî ku vîn û muxatabiya aliyan nas dike, bê avakirin. Nabe ku nîqaşên wekî "ew tê, ev nayê" bên kirin. Divê kategorî nebin. Divê her kes bikaribe bi hêsanî û bêyî dudilî di deriyê aştiyê re derbas bibe.
• Ya duyem, wekî ku di raporên Komîsyona Meclîsê de jî cih girtiye, divê dawî li feraseta qeyûm bê anîn. Divê biryarên Dadgeha Mafên Mirovan a Ewropayê (DMME) û Dadgeha Destûra Bingehîn (AYM) bên sepandin û vîna hilbijartî bi temamî bê misogerkirin.
• Ya sêyem, divê astengiyên li pêşiya siyaseta demokratîk bên rakirin. Divê Tirkiye veguhere welatekî ku ne bi korîdorên edliyeyê û girtîgehan, lê bi siyasetê diaxive. Divê hebûna mirov û jiyana hevpar a di nav aştiyê de ji dil pir girîng bê dîtin û em jî xebatên xwe bi danîna vê yekê di navenda xwe de bimeşînin.
• Ya çarem, birêkûpêkkirina şert û mercên ragihandin û xebatê yên Birêz Abdullah Ocalan bi awayekî azad û li gorî hewcedariyên çareseriya demokratîk.