Helwest û daxuyaniyên nakok ên Serokê Amerîkayê Donald Trump egera danûstandin û şerê bi Îranê re xistiye tuneleke tarî. Trump ji aliyekî ve balê dikişîne ser berdewamiya diyalog û dîplomasiyê, ji aliyê din ve jî tekezî li ser êrişeke leşkerî ya berfireh dike.

Serokê Amerîkayê tekezî li ser amadebûna Tehranê ji bo gihîna rêkeftinekê kir û got ku her du welat ji bo dîtina çareseriyekê ji bo nakokiyê di danûstandinan de ne, lê bawer dike ku Tehran hîn bi tevahî ne amade ye ku bigihe rêkeftineke dawî.

Trump behsa vebijarkên leşkerî û siyasî yên Amerîkayê kir û got: "Îran hîn ji bo rêkeftinekê ne amade ye, lê danûstandinên me berdewam dikin. Me hîn biryareke dawî li ser bikaranîna hêza leşkerî ya mezin nedaye ji ber ku aliyê din pêvajoya danûstandinan cidî digire. Erê, bi demê re, ew ê bêtir amade bin ku li hev bikin."

Trump di hevpeyvînekê de bi Axios re got ku vebijarka leşkerî bi tevahî neqediyaye û dibe ku Amerîka serî li operasyoneke mezin a ji yên berê mezintir bide.

Wall Street Journal her wiha ragihand ku Trump gihaye wê baweriyê ku Îranî ji bilî "zimanê hêzê" tiştekî din fêm nakin, rêberên xwe wekî "dîn" bi nav dikin û gefên berdewamkirina êrişan dixwin.

Li gorî Wall Street Journal, ev daxuyaniyên cûrbicûr dikarin bibin beşek ji stratejiyeke fişarê ji bo xurtkirina cihê Washingtonê li ser maseya danûstandinan, da ku Tehran neçar bimîne ku dev ji hin bernameyên xwe yên nuklerî û daxwazên din berde.

Analîstên siyasî li ser van daxuyaniyên nakok dabeş bûne, hin pispor bawer dikin ku daxuyaniyên wiha bi zanebûn in, Trump dixwaze aliyê din bi berdewamî di gumanan de bihêle ku nizanibe gava din a Amerîkayê dê çi be. Yên din bawer dikin ku stratejiya birêveberiya Trump ji bo mijûlbûna bi şerê Îranê re ne diyar e û dê li gorî pêşketinan biguhere.