پووختەى هەواڵ

• عەلى زەیدى سەرپەرشتیى کۆبوونەوەیەکى دەستەى بەڕێوەبردنى قەیرانەکانى کرد.

• زەیدى لایەنەکانى ڕاسپاردووە بۆ ڕووبەڕووبوونەوەى هەر قەیرانێک ئامادەکاریى بکەن.

• دیار نییە هۆکارى ئەم داواکارییەى زەیدى ڕێکارێکى ئاسایى حکومەتە یان ئامادەکارییە بۆ پێشهاتى نوێ.

عەلى زەیدى، سەرۆکوەزیرانى عێراق، لایەنە پەیوەندیدارەکانى ڕاسپارد ئامادەکاریى بکەن بۆ ڕووبەڕووبوونەوەى هەر قەیران و کارەساتێک و خۆراک و دەرمان دابین بکەن.

نووسینگەى ڕۆژنامەوانیى سەرۆکوەزیرانى عێراق:

• عەلى زەیدى، سەرۆکوەزیران و فەرماندەی گشتیی هێزە چەکدارەکان، سەرۆکایەتیی کۆبوونەوەی دەستەی باڵای بەڕێوەبردنی قەیرانەکان، کارەسات و حاڵەتە نائاساییەکان کرد.

• لە کۆبوونەوەکەدا پوختەى پلانى ستراتیجیی نیشتمانى بۆ ڕووبەڕووبوونەوەى قەیران و کارەساتەکان کە لەلایەن ڕاوێژکارێتى ئاسایشى نیشتمانییەوە ئامادە کرابوو، بۆ فەرماندەى گشتى هێزە چەکدارەکان خرایەڕوو.

• لە کۆبوونەوەکەدا عەلى زەیدى جەختی لەسەر گرنگی دابینکردنی تەواوی پێویستییەکانی خۆراک، دەرمان و سووتەمەنی کردەوە، بە مەبەستی ڕووبەڕووبوونەوەی هەر قەیرانێک، چ سروشتی بێت یان مرۆیى.

• وەزارەتی داراییشی ڕاسپارد، بودجەی گونجاو لەپێناو دابینکردنی ئەم پێویستییانە تەرخان بکات.

ئەم ئامادەکارییە لە کاتێکدایە، بەهۆى جەنگى ئێرانەوە، عێراق زیانى زۆرى بەرکەوت و بەو هۆیەوە داهاتى نەوتى بە تەواوەتى دابەزى، بەڵام چەند مانگێکە دۆخەکە تاڕادەیەک ئاسایى بووەتەوە، بۆ خۆراک و دەرمانیش عێراق بە زۆریى پشت بە هاوردە دەبەستێت.