ئەمینداری گشتیی بزووتنەوەی عەسائیبی ئەهلولحەق، لەبارەی خۆ هەڵوەشاندنەوەی پارتی کرێکارانی کوردستان (پەکەکە) دەڵێت، چیدی تورکیا هیچ پاساوێکی نامێنێت بۆ داگیرکردن و پێشێلکردنی سەروەریی و یەکپارچەیی خاکی عێراق، داواش لە پەکەکە دەکات، ناوچەکە چۆڵبکات.

قەیس خزعەلی، ئەمینداری گشتیی عەسائیب ئەهلولحەق دەڵێت، سوپای تورکیا بە بیانووی رووبەڕووبوونەوەی پەکەکە، رووبەرێکی فراوانی زیاتر لە 5 هەزار کیلۆمەتر چوارگۆشەی خاکی عێراقی داگیرکردووە و 183 بنکەی سەربازیی لە دهۆک و هەولێر و نەینەوا هەیە.

خەزعەلی داوایکردووە، حکومەتی عێراق هەرچی زووە، ئەو بنکە و بارەگایانە کۆنترۆڵبکات پاشئەوەی سوپای تورکیا چۆڵیاندەکات.

ئاماژەی بەوەشکردووە: پێویستە حکومەت و ئەنجوومەنی نوێنەرانی عێراق هەموو رێوشوێنێک بگرنەبەر بۆ گەرەنتیکردنی سەروەریی عێراق پاش ئەم هەنگاوەی پەکەکە.

بەگوتەی خزعەلی، دەبێت هەموو رێوشوێنێکی پێویست بۆ دڵنیابوون لە کشانەوەی تەواوەتیی سوپای تورکیا و ئەندامانی پەکەکە لە خاکی عێراق بگیرێتەبەر.

ئاماژەی بەوەشکردووە، پاراستنی سنوورەکانی عێراق، زامنی ئاسایش و سەروەریی تورکیا و یەکپارچەیی سنوورەکانی ئەو وڵاتەش دەکات.

قەیس خزعەلی دەڵێت، با سوود لە بەستنی لوتکەی عەرەبی لە بەغداد وەربگیرێت بۆ ئەم پرسە و داوای لە وڵاتانی عەرەبی کرد، بڕیارنامەیەک پەسەند بکەن کە بە خێرایی داوای کشانەوەی سەرجەم هێزەکانی تورکیا لە خاکی عێراق بکات.

رۆژی دووشەممە، پارتی کرێکارانی کوردستان (پەکەکە) لە راگەیەندراوێکیدا لەسەر راسپاردەی عەبدوڵا ئۆجەلان، پاش 47 ساڵ لە کاری سیاسی و خەباتی چەکداری، بڕیاری خۆ هەڵوەشاندنەوە و چەکدانانی دەرکرد.

سەبارەت بە بڕیارى خۆهەڵوەشاندنەوە و چەکدانانى پەکەکە، مەزڵوم عەبدی فەرماندەی گشتی هێزەکانی سووریای دیموکرات رایگەیاند، "هیوادارین هەموو لایەنە پەیوەندیدارەکان هەنگاوی پێویست بۆ سەرکەوتنى پرۆسەکە بنێن".

مەزڵوم عەبدی لە راگەیەندراوێکدا لە تۆڕى کۆمەڵایەتى ئێکس دەڵێت، بڕیارەکانی پەکەکە بۆ هەڵوەشاندنەوەی پێکهاتەی رێکخراوەیی خۆی و کۆتاییهێنان بە خەباتی چەکداری و دەستپێکردنی پرۆسەی سیاسی دیموکراسی، لەسەر بانگەوازی ئۆجەلان، شایانی رێزگرتنە.

بە گوتەی مەزڵوم عەبدی، پەکەکە لە ماوەی رابردوودا رۆڵێکی مێژوویی و سەرەکی لە رۆژهەڵاتی ناوەڕاستدا گێڕاوە و پێیان وایە، ئەو هەنگاوە نوێیە رێگە بۆ پرۆسەیەکی نوێی سیاسی و ئاشتییانە لە ناوچەکەدا خۆشدەکات.

مەزڵوم عەبدی فەرماندەی گشتی هێزەکانی سووریای دیموکرات راشیگەیاند، هیوادارن هەموو دۆستان پاڵپشتی پێویست پێشکەش بە سەرکەوتنى پرۆسەکە بکەن.

عەلی یەرلیکایا، وەزیری ناوخۆی تورکیا لەبارەی بڕیاری پارتی کرێکارانی کوردستان بۆ خۆهەڵوەشاندنەوە و چەکدانان پەیامێکی ڤیدیۆیی بڵاوکردەوە و رایگەیاند، بڕیارەکە سەرکەوتنی ئەو بڕوایە بوو کە بە ئاشتیی و برایەتیی هەبوو.

وەزیری ناوخۆی تورکیا گوتیشی، قۆناغێکی نوێ لە تورکیا دەستیپێکردووە و ئیتر لەبری چەک، وشەکان و لەبری ترسیش ئومێد هەیە.

عەلی یەرلیکایا، وەزیری ناوخۆی تورکیا لە درێژەی لێدوانەکەیدا گوتی "پەکەکە بڕیاری خۆهەڵوەشاندنەوە و چەکدانانی راگەیاند. تورکیای بێتیرۆر سەرکەوتنی ئەو بڕوایە بوو کە بە ئاشتی و برایەتیی هەبوو. خاوەنی ئەم سەرکەوتنە گەلەکەمانە و گرەنتییەکەشی یەکگرتووییمانە. ئەم گەلە بە تورک، کورد، لاز و چەرکەسییەوە لەژێر هەمان ئاڵادا دەژین و بە درێژایی مێژوو شان بە شانی یەکتر چەندین رێگرییان تێپەڕاندووە. هەرچی کرا نەتوانراوە پەیوەندییەکانی نێوانمان بپچڕێنن و لە داهاتووشدا ناتوانن بیپچڕێنن. ئێستا ئیتر قۆناغێکی نوێ دەستیپێکردووە، ئیتر لەبری چەک، وشەکان دێنە گۆ. لەبری ترس، ئومێد هەیە".

ئەنجوومەنی ناوەندی بەڕێوەبردنی پارتی دەم لەبارەی بڕیارەکانی کۆنگرەی پارتی کرێکارانی کوردستان کۆبووەوە و پاش تەواوبوونی کۆبوونەوەکەش تولای هاتیمئۆغوڵڵاری، هاوسەرۆکی پارتی دەم لە کۆنفرانسێکی رۆژنامەوانیدا رایگەیاند، راگەیەندراوەکەی پەکەکە، بڕیار و قۆناغێکی زۆر گرنگە لە مێژووی تورکیادا.

هاوسەرۆکی پارتی دەم ئاماژەی بەوەشکرد، کاتی هێنانەئارای گۆڕانکاریی دیموکراسییانەیە، بۆیە پێویستە هەنگاوی بەپەلە بنرێت و کار بۆ بنیادنانی کۆماری دیموکراسیی تورکیا بکرێت، چونکە بەو بڕیارەی پەکەکە رێگەکە کراوەتەوە.

هاتیئۆغوڵڵاری ئاماژەی بە گرنگیی قۆناغی داهاتوو کرد و گوتی، پێویستە هەنگاوی کردەیی بۆ دیموکراتیزەکردنی تورکیا بنرێت.

تولای هاتیمئۆغوڵڵاری، هاوسەرۆکی پارتی دەم   گوتیشی "بڕیارەکەی پەکەکە لە چوارچێوەی بانگەوازەکەی 27ـی شوباتدایە. بڕیارەکەی پەکەکە بڕیار و قۆناغێکی زۆر گرنگە لە مێژووی تورکیادا. پێشکەوتنی ئەو هەنگاوە کردەییانەی بۆ دیموکراتیزەکردنی تورکیا دەنرێن لە داهاتوودا، زۆر یەکلاکەرەوە دەبن. لە شوێنێکدا کە چەکەکان بێدەنگدەکرێن و پێکدادان نین، گرنگترین ئەرک دەکەوێتە سەرشانی هەموومان بە کۆمەڵگەی تورکیا، دەسەڵات، ئۆپۆزسیۆن و هەموو لایەنە کۆمەڵایەتییەکانەوە، بریتییە لە هێنانەئارای گۆڕانکاریی دیوکراسییانە، بۆیە پێویستە هەنگاوی بەپەلە بنرێن و رێگە بۆ بنیادنانی کۆماری دیموکراسیی تورکیا بکرێتەوە، چونکە رێگەکە کراوەتەوە. بەهیوام ئەو بڕیارە ببێتە خێر بۆ هەموو گەلانی تورکیا."

وەزارەتی دەرەوەی عێراق پێشوازی لە بڕیارى چەکدانان و خۆهەڵوەشاندنەوەی  پەکەکە دەکات، داوای پێداچوونەوەش بە بیانوو و پاساوەکانی دەستوەردانی هێزی بیانیی دەکات لەناو خاکی عێراقدا.

وەزارەتی دەرەوەی عێراق لە راگەیەندراوێکیدا دەڵێت، پێشوازی لە بڕیارى خۆهەڵوەشاندنەوەی پارتی کرێکارانی کوردستان و راگرتنی ململانێی چەکدارى و چەکدانان دەکەین و بەهەنگاوێکی ئەرێنی و گرنگی دەزانین بۆ بەرقەرابوونی ئاسایش و سەقامگیری لە عێراق و ناوچەکە.

عێراق خۆهەڵوەشاندنەوەی پەکەکە بە دەرەفەتێکی راستەقینە دەبینێت بۆ بەرەوپێشبردنی پرۆسەی ئاشتی و کۆتاییهاتنی ململانێیەکان کە بۆ چەند دەیەیەکە کاریگەرییان لەسەر گەلانی ناوچەکە هەبووە.

وەزارەتی دەرەوەی عێراق داوادەکات، کۆتایی بەو بیانوو و پاساوانەش بهێندرێت، کە بەکاردەهێنران بۆ دەستوەردانی هێزی بیانی لەناو خاکی عێراقدا.

عێراق جەخت لە گرنگیی چارەسەرکردنی سەرجەم ئاڵنگارییە ئەمنییەکان دەکاتەوە لە رێگەی گفتوگۆ و لێکتێگەیشتنەوە، بەشێوەیەک خواستەکانی گەلانی ناوچەکە لە ئاسایش و گەشەپێدان بەدیبهێنێت.

قوباد تاڵەبانی جێگری سەرۆکوەزیرانی هەرێمی کوردستان، لە پەیامێکدا لەبارەى خۆهەڵوەشاندنەوە و چەکدانانى پەکەکە، رایگەیاند، پەکەکە بەرپرسیاریەتیی خۆی بەرامبەر بە پرۆسەی ئاشتی جێبەجێ کردووە و هیواى خواست تورکیا دەرفەتەکە بۆ چارەسەرکردنی پرسی کورد بقۆزێتەوە.

جێگری سەرۆکوەزیرانی هەرێمی کوردستان، لە راگەیەندراوێکدا دەڵێت، پارتی کرێکارانی کوردستان لە کۆنگرەی 12ـی خۆیدا بەرپرسیارێتیی خۆی بەرامبەر بە پرۆسەی ئاشتی لە تورکیا جێبەجێ کرد و دەرگای بەڕووی قۆناغێکی نوێدا کردەوە .

قوباد تاڵەبانی، ئاماژەى بەوەشکرد، هیوادارن حکومەت و دامەزراوە یاساییەکان و لایەنە سیاسییەکانی تورکیا ئەو دەرفەتە بقۆزنەوە بۆ چارەسەرکردنی یاسایی و ئاشتییانەی پرسی کورد لە تورکیا.

رەجەب تەیب ئەردۆغان، سەرۆککۆماری تورکیا پاش کۆبوونەوەی کابینەی سەرۆکایەتیی کۆمار لە کۆنفرانسێکی رۆژنامەوانیدا بڕیاری کۆنگرەی پەکەکەی بۆ خۆهەڵوەشاندنەوە و چەکدانان بە "گرنگ" ناوبرد و گوتی، کۆتاییهێنانی تەواوەتیی بە "تیرۆر و توندوتیژی"، دەرگای قۆناغێکی نوێ دەکاتەوە.

سەرۆککۆماری تورکیا ئاماژەی بەوەشکرد، ئەوان بەو جۆرە هەڵسەنگاندن بۆ بڕیارەکەی پەکەکە دەکەن، کە هەموو درێژکراوەکانیان دەگرێتەوە، بەتایبەت درێژکراوەکانیان لە هەرێمی کوردستان، رۆژئاوای کوردستان و ئەوروپا.

ئەردۆغان لە درێژەی گوتەکانیدا گوتی، بۆ ئەوەی زیان بەر پرۆسەکە نەکەوێت، دەزگای هەواڵگریی نیشتمانیی "میت" و دامەزراوەکانی دیکەی وڵاتەکەی، چاودێریی پرۆسەکە دەکەن.

ئاماژەی بەوەشکرد، وەک هاوپەیمانی جمهوور بە لادانی بەربەستەکان، شکاندنی بڕیارە پێشوەختەکان و خۆپاراستن لە ئاژاوەگێڕیی و کەوتنە داوەکان، هەنگاوی دڵنیاکەرەوەیان بەرەو 'تورکیای بێتیرۆر ناوە.

رەجەب تەیب ئەردۆغان، سەرۆککۆماری تورکیا لە درێژەی قسەکانیدا گوتی "لە پرۆسەی تورکیای بێتیرۆر بە هەنگاوی دڵنیاکەرەوە بەردەوامین. لەو پرۆسەیەدا کە بە دڵسۆزییەوە بەڕێوەی دەبەین، ئەمڕۆ قۆناغێکی زۆر گرنگمان تێپەڕاند. پەکەکە بڕیاری چەکدانانی دا. بڕیارەکە بە گرنگ دەزانین. بە کۆتاییهێنانی تەواوەتیی بە تیرۆر و توندوتیژی، دەرگاکانی قۆناغێکی نوێ دەکرێنەوە و پیلانەکانی ئیمپریالیستەکان گورزێکی کوشندەیان بەردەکەوێت. ئەوانەی لە فرمێسک و خوێن سوود وەردەگرن دەیدۆڕێنن و گەلەکەمان و وڵاتەکەمان دەیباتەوە. میت و دامەزراوەکانی دیکەمان بۆ ئەوەی زیان بەر پرۆسەکە نەکەوێت، چاودێریی پرۆسەکە دەکەن و ئێمەش سات بە سات چاودێریی پێویستی دۆخەکە دەکەین. ئێمە بەو جۆرە راگەیەندراوەکەی پەکەکە دەخوێنینەوە کە بڕیارەکە هەموو درێژکراوەکانی دەگرێتەوە بەتایبەت لە عێراق، سووریا و ئەوروپا. لە رۆژانی داهاتوودا خۆم و هاوڕێکانم روونکردنەوەی فراوانتر دەدەین. ئێمە هەموومان هاوڵاتی پلە یەکی تورکیاین. هەموومان تورکیاین. بە بڕیاری خۆهەڵوەشاندنەوە و چەکدانانی پەکەکە، ئیتر ئاگر ناکەوێتە ماڵەکانەوە. پشت بە خودا ئیتر بەر ئەو رۆژانە ناکەوین کە بەهۆی تیرۆرەوە دڵەکان دەسوتان."

وەزارەتی دەرەوەی ئەڵمانیا لە وەڵامی کەناڵ8 دا لەبارەی پرسی خۆهەڵوەشاندنەوەی پەکەکە رایدەگەیەنێت، ئەو بڕیارەی پەکەکە داوێتی، هەنگاوێکی گرنگە بە ئاڕاستەی کۆتاییهێنان بە توندوتیژییەکان لە ناوخۆی تورکیا و ناوچەکە.

وەزارەتی دەرەوەی ئەڵمانیا ئاماژەی بۆ ئەوەشکردووە، چارەسەری درێژخایەن بۆ کێشەی پەکەکە لە تورکیا پێویستی بە رێزگرتنی مافە کولتوریی و دیموکراسییەکانی کورد هەیە لە ناوخۆی ئەو وڵاتە.

وەزارەتی دەرەوەی ئەڵمانیا لە درێژەی وەڵامەکەیدا بۆ کەناڵ8 رایگەیاند، پاش جێبەجێکردنی بەڵێنەکەی پەکەکە، دەستپێکردنی پرۆسەیەکی سیاسیی نوێ لە ناوخۆی تورکیا ئەرکی گرنگی ئێستای سەکردەکانی ئەو وڵاتەیە.

رۆژی دووشەممە، پارتی کرێکارانی کوردستان-پەکەکە رایگەیاند، ئەرکی مێژوویی خۆی تەواوکردووە و لەسەر ئەو بنەمایەش، بڕیاردراوە بە هەڵوەشاندنەوەی هەیکەلی رێكخراوەیی پارتەکە و کۆتاییهێنان بە خەباتی چەكداری و ئەو چالاکییانەی بەناوی پارتەکەوە ئەنجامدەدرێن.

رێبەر ئەحمەد، وەزیرى ناوخۆى حکومەتى هەرێمى کوردستان، بە رۆژنامەوانانى رایگەیاند، پشتگیرى لە پرۆسەى ئاشتى لە باکوورى کوردستان و تورکیا دەکەن و ئامادەیى هەرێمى کوردستانى بۆ سەرخستنى پرۆسەکە دەربڕى.

رێبەر ئەحمەد، ئاماژەى بەوەشکرد، بەلایانەوە گرنگە کۆتایى بە پێکدادانى چەکداریى نێوان پەکەکە و تورکیا لە هەرێمى کوردستان بێت و هاونیشتمانییان بتوانن بەگەڕێنەوە شوێنەکانى خۆیان و ئارامى لە ناوچەکە بەرقەراربێت.

هەڤاڵ ئەبوبەکر پارێزگاری سلێمانی، پێشوازى لە بڕیار و هەنگاوەکانى پەکەکە بۆ چەکدانان دەکات و دەڵێت: ئومێد دەکەن ئەو هەنگاوە ببێتە هۆى تەواوبوونى بارودۆخە نائاساییەکان.

هەڤاڵ ئەبوبەكر، ئاماژەى بەوەشکرد، ئەو هەنگاوە رەنگدانەوەى بەسەر هەموو ئەو بارودۆخە نائاسایانەى سلێمانى و فڕۆکەخانەى نێودەوڵەتیى سلێمانییش دەبێت.

پارێزگاری سلێمانی، راشیگەیاند، گفتوگۆکان بەو ئاڕاستەیەن پرۆسەکە لە دەرەوەى تورکیا و هەرێمى کوردستانیش بچێتە پێشەوە و کاریگەریى لەسەر ناوچە بەگشتى دەبێت.

هەڵگورد شێخ نەجیب، ئەندامى پەرلەمانى کوردستان لە فراکسیۆنى پارتى دیموکراتى کوردستان رایگەیاند، بە بڕیارى خۆهەڵوەشاندنەوە و چەکدانانى پەکەکە، زیاتر لە 200 بۆ 300 گوند لە سنوورى ئیدارەى سەربەخۆى سۆران قازانج دەکەن، کە بەهۆى بۆردوومانى تورکیا و ململانێى چەکداریی پەکەکە و دەوڵەتى تورکیاوە زیانیان بەرکەوتووە و چۆڵکراون.

هەڵگورد شێخ نەجیب، گوتیشى، پلانى باشیان بۆ ئاوەدانکرنەوەى گوندەکانى سنوورەکە هەیە و بەشێکى ئەو گوندانەشى لەو ململانێیانە زیانیان بەرکەوتووە، شوێنى گەشتیاریی و گرنگن و گەشتیارێکى زۆر بۆخۆیان رادەکێشن.

رەمزى کارتاڵ، هاوسەرۆکى کۆنگرەى گەل، لەمیانەى بەشداریکردنى لە بوڵتنى کاتژمێر 5ـى کەناڵ8 رایگەیاند، دەبێت تورکیا زەمینەسازى بۆ پرۆسەکە بکات و لەو چوارچێوەیەشدا زەمینەى یاسایى و دەستووریى بڕەخسێنێت.

رەمزى کارتاڵ، ئاماژەى بەوەشکرد، بڕیار و ئیرادە هەیە بۆ چەکدانانى پەکەکە و پێویستە تورکیاش زەمینەسازیى بۆ چەکدانان بکات و هەردوولا لەسەر شێوازى دانانى چەک رێکبکەون.

هاوسەرۆکى کۆنگرەى گەل گوتیشى، تاوەکو ئێستا هێرشەکانى سوپاى تورکیا بۆسەر پەکەکە بەردەوامن و ئەگەر تورکیا بەردەوام بێت لە هێرشەکانى بۆسەر پەکەکە، ئەوانیش مافى خۆیانە بەرگرى لە خۆیان بکەن و وەڵامیان بدەنەوە.

رەمزى کارتاڵ، ئاماژەى بەوەشکرد، باوەڕیان بە دۆستەکانیان هەیە پرۆسەى ئاشتى بەدیبێت و لەو بڕوایەدان عەبدوڵا ئۆجەلان ئازاد بکرێت، دەشڵێت، بەگوێرەى یاسا پێویستە ئازاد بکرێت.

هاوسەرۆکى کۆنگرەى گەل بەپێویستیشى دەزانیت، پەرلەمانى تورکیا ئەرکەکانى خۆى بۆ پرۆسەکە جێبەجێبکات و سزاکانى سەر ئۆجەلان لاببات بۆ ئەوەى بەشداریى کاراى لە پرۆسەکەدا هەبێت.

هاکان فیدان، وەزیری دەرەوەی تورکیا پاش کۆبوونەوەی لەگەڵ وەزیرانی دەرەوەی سووریا و ئوردن لە کۆنفرانسێکی رۆژنامەوانیی هاوبەشدا رایگەیاند، بڕیارەکەی پارتی کرێکارانی کوردستان بۆ خۆهەڵوەشاندنەوە و چەکدانان مێژوویی و گرنگە.

وەزیری دەرەوەی تورکیا ئاماژەی بەوەشکرد، بڕیارەکە لەڕووی هێنانەئارای ئاشتییەکی هەمیشەیی و سەقامگیری لە ناوچەکەدا زۆر گرنگە و بەوردیی چاودێریی هەنگاوەکانی داهاتوو دەکەن.

هاکان فیدان، وەزیری دەرەوەی تورکیا گوتی "بە بۆچوونی من ئەو بڕیارەی پەکەکە داویەتی مێژوویی و گرنگە، بەتایبەت بۆ هێنانەئارای ئاشتییەکی هەمیشەیی و سەقامگیریی زۆر بە گرنگی دەبینم. چەند هەنگاوێکی کردەیی هەن کە پاش ئەم بڕیارەی پەکەکە دەنرێت و بە وردییەوە چاودێریی ئەو هەنگاوانە دەکەین. جێبەجێکردنی راستگۆیانەی بڕیارەکە و رەواندنەوەی نیگەرانییەکان، بە خێردار دەبینم بۆ هاوڵاتییان و داهاتوومان. بەڕێز باخچەلی بانگەوازی خۆی کرد، سەرۆککۆمارمان ئیرادەیەکی زۆر بەهێزی پیشاندا و پەکەکەش وەڵامێکی ئەرێنیی دایەوە. هاوکات پارتی دەم دەستی بە کار کردووە. ئێمە وەک رۆڵەکانی ئەم وڵاتە بە عەقڵ و حیکمەتی خۆمان بەرپرسیارییەتیی مێژووییمان جێبەجێدەکەین. پشت بە خودا لە پراکتیکدا هەندێک هەنگاوی دیکە هەیە دەنرێن و وردەکاریی زۆر هەیە."

بافڵ جەلال تاڵەبانی، رایگەیاند، بڕیاری پەکەکە بۆ بەدەمەوەچوونی بانگەوازەکەی عەبدوڵا ئۆجەلان و خۆهەڵوەشاندنەوە و چەکدانان لەم قۆناغەدا هەنگاوێکی مێژووییە و پێشوازیی لێدەکەن، دەشڵێت: تەنیا رێگا بۆ سەقامگیری چارەسەرکردنی ئاشتییانەی کێشەی کوردە.

سەرۆکی یەکێتیی نیشتمانیی کوردستان لە پەیامەکەیدا بەبۆنەى چەکدانانى پەکەکە، ئاماژەى بەوەشکردووە، یەکێتیی نیشتمانیی کوردستان وەک هەمیشە پەرۆشە بۆ سەرخستنی پرۆسەی ئاشتی و هاوکار و پشتیوانی هەموولایەک دەبێت بۆ سەرخستنی ئەو هەوڵە.

راشیگەیاند، ئەوان بە شوێن هەنگاوەکانی مام جەلال دا ستراتیجی نیشتمانیی خۆیان ئاڕاستە دەکەن کە وەک یەکەم سەرکردە شانی دایە بەر سەرپێخستنی پرۆسەی ئاشتی، ئەمڕۆش بەردەوامن لە هەوڵەکانیان بۆ سەرخستنی ئەو هەنگاوە مێژووییە.

بافڵ جەلال تاڵەبانی، جەختلەوەشدەکاتەوە، تەنیا رێگا بۆ سەقامگیری لە رۆژهەڵاتی ناوەڕاست چارەسەرکردنی ئاشتییانەی کێشەی کوردە و هیواش بۆ سەرخستنى پرۆسەى ئاشتى لە باکووری کوردستان و تورکیا دەخوازێت، تاوەکو لاپەڕەیەکی نوێی سیاسی و دیپلۆماسی لەنێوان سەرجەم لایەنەکان هەڵبدرێتەوە و هەنگاو بۆ کارکردنی پێکەوەیی بنرێت و کاریگەریی ئەرێنی لەسەر تەواوی کوردستان هەبێت.

سەرۆکایەتیی کۆماری تورکیا هەواڵی دروستکردنی فیدراڵی و دەسەڵاتی ئۆتۆنۆمی لەپاش کۆنگرەی پەکەکە رەتدەکاتەوە و دەشڵێت، لە چیای گارە هیچ پێکدادانێک لەنێوان سوپای تورکیا و پەکەکە رووینەداوە.

ناوەندی بەرەنگاربوونەوەی زانیاریی ناڕاست کە سەربە سەرۆکایەتیی پەیوەندییەکانی سەرۆکایەتیی کۆماری تورکیایە، رایگەیاند، ئەو دەنگۆیانە ناڕاستن باس لەوە دەکەن "پاش کۆنگرەی پەکەکە، لەرێگەی گۆڕانکاریی دەستورییەوە دەسەڵاتی ئۆتۆنۆمی و فیدراڵی دێتە ئاراوە."

ناوەندەکە ئاماژەی بەوەشکردووە، کارەکانی پەیوەست بە گۆڕینی دەستوور بەردەوامن و تورکیا پێویستی بە دەستوورێکی مەدەنی، دیموکراسیی، هەموو کەس لەخۆگر و ئازادیخواز هەیە.

ناوەندەکە لە درێژەی روونکردنەوەکەیدا دەڵێت، ئەوەی دەوڵەت لەسەر پرۆسەی "تورکیای بێ تیرۆر" و پەیوەست بە بڕیاری خۆهەڵوەشاندنەوە و چەکدانانی پەکەکە دەیکات، لەسەر بنەمای سەودا و مامەڵە نییە.

ناوەندی بەرەنگاربوونەی زانیاریی ناڕاست لە راگەیەندراوێکی دیکەدا ئەو هەواڵانە رەتدەکاتەوە کە باس لە پێکدادانی نێوان سوپای تورکیا و پەکەکە لە چیای گارە دەکەن و دەڵێت، هیچ پێکدادانێک لەو ناوچەیەدا رووینەداوە و داواش لە خەڵک دەکات، بەها بۆ ئەو هەواڵانە دانەنێن کە بۆ زیانگەیاندن لە پرۆسەکە بڵاودەکرێنەوە.

هەرچەندە تورکیا رەتیدەکاتەوە، ئەمڕۆ هیچ پێکدادانێک لە نێوان سوپاى وڵاتەکەى و پەکەکە روویدابێت، بەڵام بە گوتەى شایەتحاڵەکان، ئەمڕۆ تورکیا زیاتر لە پەنجا جار گوندەکانی سنووری شارەدێی دێرەلوکی بۆردوومانکردوە.

لەزگین بەرچی، موختارى گوندی بەرچی رایگەیاند، لە کاتژمێری نۆی بەیانی ئەمڕۆوە، زیاتر لە پەنجا جار گوندەکانی مژێ، كەفنە مژێ، سپیندارێ و گرگاشی لەلایەن تورکیاوە بۆردوومانکراون.

پەیامنێرمان عومران یوسف ئەزلایڤێکی لە گوندی بەرچییەوە ئامادەکردووە و بینەری دەبین

سەڵاحەدین دەمیرتاش، پێشوازیی لە بڕیاری خۆهەڵوەشاندنەوەی پارتی کرێکارانی کورستان دەکات و دەڵێت، کاتی گەورەبوونی تورکیایە.

نیوەڕۆی رۆژی دووشەممە، پەورین بوڵدان، ئەندامی شاندی ئیمراڵی، بەمەبەستی گفتوگۆکردن لەبارەی بڕیاری خۆهەڵوەشاندنەوە و چەکدانانی پەکەکە، لە زیندانی ئەدیرنە سەردانی سەڵاحەدین دەمیرتاش، هاوسەرۆکی پێشووتری هەدەپەی کرد.

دەمیرتاش لە پەیامێکدا کە لە رێگەی بوڵدانەوە بڵاویکردووەتەوە دەڵێت، ئیتر کاتی کارکردنی هاوبەش، پێکەوەیی و دڵسۆزانەیە، بۆ گەورەبوونی تورکیا لە هەموو روویەکەوە.

هاوسەرۆکی پێشووتری هەدەپە کە زیاتر لە نۆ ساڵە لە زیندانی ئەدیرنەیە ئاماژەی بەوەشکردووە، کاتی بەدیهێنانی ئارامیی، خۆشگوزەرانی، دیموکراسی و ئازادییەکانە.

دەمیرتاش لە درێژەی پەیامەکەیدا دەڵێت، "بەبۆنەی ئەنجامەکانی کۆنگرەی پەکەکەوە، سوپاسی سەرکردایەتیی پەکەکە، بەڕێزان عەبدوڵا ئۆجەلان، رەجەب تەیب ئەردۆغان، دەوڵەت باخچەلی، ئۆزگور ئۆزەل، سەرکردایەتیی پارتی دەم و سەرۆکی سەرجەم پارتە سیاسیییەکان دەکەم."

دەمیرتاش سوپای ئەحمەد تورک و پەروین بوڵدانی کردووە و یادی سڕی سورەییا ئۆندەریشی کردووەتەوە، کە بە یەکێک لە کەسایەتییە هەرە دیارەکانی پرۆسەکە دادەنرێت و رۆژی سێی ئایار و دوای 18 رۆژ مانەوە لە یەکەی چاودێریی چڕ، بەهۆی جەڵتەی دڵەوە کۆچی دوایی کرد.

مەسعود بارزانی، سەرۆکی پارتی دیموکراتی کوردستان لەبارەی چەکدانانی پەکەکە و خۆهەڵوەشاندنەوەی، رایگەیاند، بڕیارەکانی کۆنگرەی پەکەکە هەنگاوی ئەرێنین بە ئاڕاستەی پرۆسەی چارەسەری ئاشتییانە و بەهەموو شێوەیەک پاڵشتی و پشتیوانیی پرۆسەکە دەکەن.

مەسعود بارزانى، لە راگەیەندراوێکدا کە بارەگای بارزانی بڵاویکردووەتەوە، رایگەیاندووە "جێگەی خۆشحاڵییە لە پرۆسەی چارەسەریی ئاشتی لە تورکیا، لایەنەکان هەڵوێستی باشیان هەبوو و هەنگاوی ئەرێنی بە ئاڕاستەی چارەسەری ئاشتییانە گیراوەتەبەر و پەکەکەش کۆنگرەی خۆی بەست و ژمارەیەک بڕیاری دەرکرد.

بارزانى، هیوایخواستووە، ئەو پرۆسەیە بگاتە ئەنجامێکی باش و لە بەرژەوەندی و خێری ناوچەکە و هەموو لایەک بێت، پشتیوانی خۆشى بۆ سەرکەوتنى پرۆسەکە راگەیاندووە.

دیوانی کۆنگرەی 12ـی پەکەکە ئاماژەی بە گیانلەدەستدانی ئەو کادیری پێشکەوتووی پەکەکە کردووە کە لەدامەزرێنەرانی حزبەکە و هاوڕێ سەرەتاییەکانی ئۆجەلان بوون، ئەوانیش "عەلی حەیدەر قەیتان ناسراو بە فوئاد دێرسیم و رەزا ئاڵتون"ن کە لە ساڵانی 2018 و 2019 گیانیان لەدەستداوە.

رەزا ئاڵتون

لە کادرە سەرەکییەکانی پەکەکە بووە

کەسێکی نزیک بووە لە عەبدوڵا ئۆجەلان

سەرپەرشتیی دارایی و پەیوەندییەکانی پەکەکەی کردووە

ساڵی 1954 لە پارێزگاى قەیسەری لەدایکبووە

بنەماڵەکەى بەڕەچەڵەک خەڵکی دێرسیمە

ساڵی 1974 دەستی بە کاری سیاسی کردوە

لە 1979 دەستگیرکرا تاوەکو 1991 لە زیندان بووە

ساڵی 2001 لە ئەوروپا سەرپەرشتیی پەکەکەی کردووە

لە ئەوروپا ماوەیەک بەهۆی پەکەکەوە زیندانیکراوە

رۆڵی سەرەکیی لە دامەزراندنی کەجەکە و نوێکردنەوەی پەکەکە هەبوو

لە ساڵی 2007 گەڕاوەتەوە کوردستان

لە ساڵی 2019 گیانیلەدەستدا

عەلی حەیدەر قەیتان

لەناو پەکەکەدا بە فوئاد دێرسیم ناسراوە

یەکێکە لە دامەزرێنەرانی پەکەکە

ساڵی 1951 لە دێرسیم لەدایکبووە

ساڵی 1971 لە ئەنقەرە کاری سیاسی دەستپێکردووە

لەسەر چالاکی حەوت مانگ خراوەتە زیندانەوە

لە کاری تیۆری و ئایدۆلۆجیی پەکەکە رۆڵی بەرچاوی هەبووە

چەندین کتێبی نووسیوە لە بوارەکانی فەلسەفە، ئەدەب و مێژوو

 ساڵی 2018 گیانیلەدەستداوە

گوڵستان کۆچیغیت، بریکاری سەرۆکی فراکسیۆنی پارتی دیموکراسیی و یەکسانیی گەلان لەبارەی بڕیارەکەی پەکەکە بۆ خۆهەڵوەشاندنەوە و چەکدانان، گوتی: "پێویستە چوارچێوەی یاسایی پێکبهێنرێت و هەنگاو لەوبارەیەوە بنرێت".

گوڵستان کۆچیغیت، باسی بڕیارەکەی پەکەکەی بۆ خۆهەڵوەشاندنەوە و چەکدانان بۆ ئاژانسی رۆیتەرز کردووە و دەڵێت، بڕیارەکە دەروازەی قۆناغێکی نوێی کردووەتەوە و پێویستی بە چوارچێوەیەکی یاساییە.

کۆچیغیت دەشڵێت: "پێویستە هەنگاو بە ئاڕاستەی بنیادنانی متمانە لەلایەن هەردوولا و هەروەها پێکهێنانی چوارچێوەی یاسایی بۆ پرۆسەکە بنرێت".

بریکاری سەرۆکی فراکسیۆنی پارتی دەم باسی لەوەشکردووە، بڕیارەکەی پەکەکە دەکرێت ئاماژە بێت بۆ دەستپێکی پرۆسەیەکی گشتگیری بەدیموکراتیزەبوون لە تورکیا.

تونجەر باکرهان، هاوسەرۆکی پارتی دیموکراسیی و یەکسانیی گەلان "پارتی دەم" رایگەیاند،  ئۆجەلان لە دوا خاڵەوە دەستیپێکرد و گوتی، "ئەگەر چەک کێشەکەیە ئەوە لایدەدەین". باکرهان جەختلەوەشدەکاتەوە چارەسەرى پرسەکە هەر لەناوخۆى تورکیایە.

تونجەر باکرهان، لە دیمانەیەکدا لەگەڵ کەناڵی خەبەرتورک، وەڵامی پرسیارەکانی لەبارەی ئەو پرۆسەیە دایەوە، کە ئێستا لە ئارادایە و وەک دوا قۆناغیشی پەکەکە کۆنگرەی کردووە.

باکرهان ئاماژەی بەوەکرد، "وەک هاوڵاتییانی تورکیا بەدوای چارەسەرەوەن لە ئەنقەرە نەک لە دەرەوەی تورکیا". بۆ روونکردنەوەى زیاترى مەبەستەکەى، گوتیشی، "کوردی رۆژئاوا بەدوای چارەسەری کێشەکەیانەوەن لە دیمەشق، کوردی هەولێر لە بەغداد بەدوای چارەسەردا دەگەڕێن".

باسی لەوەشکرد، بەردەوام گوتوویانە چارەسەرێکیان دەوێت لە تورکیا و ئەگەر پرسەکە چارەسەر بکەن، تورکیا دەبێتە نموونە.

هاوسەرۆکی پارتی دەم جەختی لەوەکردەوە، هەرگیز کورد نەبووەتە هەڕەشە بۆ سەر تورکیا، بەرامبەر ئەوانەش کە رەخنەی ئەوە دەگرن کورد و پارتی دەم خەڵەتێندراون لەبارەی پرۆسەکە، گوتی، "ئێمە پێنج هەڵبژاردنە لە بەرەی دژی دەسەڵاتدابووین. ماوەی 22 ساڵە لەگەڵ دەسەڵات دەنگمان بە یەک ئاڕاستەدا نەڕۆیشتووە". جەختی لەوەشکردەوە ئەوان سەودا و مامەڵە لەگەڵ هیچ کەسێکدا ناکەن، چونکە دیموکراسی بۆ ئەوە نییە سەودای لەسەر بکرێت. 

تونجەر باکرهان لەبارەی بانگەوازەکەی 27ـی شوباتی عەبدوڵا ئۆجەلان رێبەری زیندانیکراوی پەکەکە بۆ چەکدانانی پارتەکەى، رایگەیاند، ئۆجەلان لە کۆتا خاڵەوە دەستیپێکرد و وەک یەکەم کار چەکی لادا. لە کاتێکدا ئەمەش دەبێت ببێتە جێگەی هیوا و ئومێد.

تونجەر باکرهان لەبارەی کاریگەریی بانگەوازەکەی ئۆجەلان لەسەر رۆژئاوای کوردستان، رایگەیاند، رێککەوتنی مەزڵوم عەبدی فەرماندەی گشتیی هەسەدە و ئەحمەد شەرع سەرۆککۆماری سووریا لەگەڵ پەیامەکەی ئۆجەلاندا یەکی دەگرتەوە.

گوتیشى، "نابێت ئەم کێشەیە ببەستینەوە بە بوونی چەکەوە لە تورکیا، یان بڵێین چەک نەماوە لە تورکیا. رەنگە ئەمڕۆ نەبێت و سبەی یەکێکی دیکە دەستی بداتێ، دەبێت عەقڵییەتەکە بگۆڕێت".

میدیای نزیک لە دەسەڵاتی تورکیا بڵاویکردەوە، پاش ئەوەی پەکەکە خۆهەڵوەشاندووەتەوە و چەکدانانى راگەیاند، دەزگاى میت تاوەکو کۆتایی حوزەیران بەدواداچوونی مەیدانی بۆ چەکدانان دەکات.

رۆژنامەی حوڕییەت کە رۆژنامەیەکی نزیک لە دەسەڵاتی تورکیا دەناسرێت لەرێگەی گۆشەیەکەوە، کە لەلایەن عەبدولقادر سەلڤییەوە نووسراوە، زانیاریی لەبارەی کۆنگرەی پەکەکە و قۆناغی دوای خۆهەڵوەشاندنەوە و چەکدانان بڵاوکردووەتەوە.

رۆژنامەکە ئاماژە بەوەشدەکات، دەزگای هەواڵگریی نیشتمانیی تورکیا "میت" تاوەکو کۆتایی مانگی حوزەیران لێکۆڵینەوە و بەدواداچوونی مەیدانی بۆ رادەستکردن و رادەستنەکردنی چەکەکان دەکات.

ئاماژە بەوەشدەکات، پرۆسەی رادەستکردنی چەکەکانی پەکەکە لەلایەن ئەو لیژنە هاوبەشانەوە چاودێریی دەکرێن، کە لەگەڵ حکومەت و کاربەدەستان لە عێراق و سووریا پێکدەهێنرێن.

رۆژنامەی حوڕییەت دەشڵێت، پاش ئەوەی میت، پشتڕاستیکردەوە، دەوڵەت خۆهەڵوەشاندنەوە و چەکدانانی پەکەکە پەسەند دەکات و تورکیا نەخشەڕێگای دوای چەکدانانی پەکەکە و ئەوەی کە ئەندامانی رێکخراوەکە چارەنووسیان چی دەبێت، داناوە.

لەبارەی چارەنووسی سەرکردەکانی پەکەکەشەوە، رۆژنامەکە نووسیویەتی: "سەرکردایەتی پەکەکە ناگەڕێنەوە تورکیا، یان دەچنە وڵاتی سێیەم یان لە عێراق دەمێننەوە".

ئاماژە بەوەشدەکات بەهۆی هەڵوەشانەوەی پەکەکەوە، پارتی دەم لەژێر کاریگەریی قەندیل دێتە دەرەوە و دەبێتە پارتی ئۆجەلان. وەک رۆژنامەکە دەڵێت، ئەمە بە دوو ئاڕاستە دەبێت، یەکەمیان لەژێر هەژموونی پەکەکە دێتە دەرەوە و دووەم رێگەی بۆ خۆشدەکرێت ببێتە پارتێکی تورکیا. 

عەبدوڵا وەرتێ، گوتەبێژى بزووتنەوەى ئیسلامیى کوردستان، رایگەیاند، ئەگەر پرۆسەى ئاشتى لە تورکیا بە ئاکام بگات، ئەوا دەبێتە هۆکارێکى سەقامگیریی رۆژهەڵاتى ناوەڕاست و وڵاتانى تورکیا و سووریا و عێراق و هەرێمى کوردستانیش.

عەبدوڵا وەرتێ گوتیشى، حیزبەکەى بەتەواوى پشتیوانیی پرۆسەى ئاشتى دەکات و بۆچوونى وایە گۆڕانکارى ئەمجارە ریشەییە و ناوچەکە پێدەنێتە قۆناغێکى نوێوە.

فاتیح سەنگاوى ئەندامى سەرکردایەتیى یەکگرتووى ئیسلامیى کوردستان رایگەیاند، لە پرۆسەى چارەسەریی ئەمیندارى حیزبەکەیان چووەتە قەندیل و چەند جارێک هەوڵى نزیکبوونەوەى تورکیا و پارتى کرێکارانى کوردستانیان داوە.

گوتیشى، "وەک یەکگرتوو پشتیوانیی پرۆسەکە دەکەین و بۆچوونیان وایە پێویستە کۆمەڵێک رێوشوێن بۆ ئاساییکردنەوەى دۆخەکە لەناو خودى تورکیاشدا بگیرێتەبەر چونکە چەندین ساڵە پەنا بۆ چەک براوە بۆیە چارەسەرى کێشەکان و ئاشتەوایی کاتێکى زۆرى دەوێت تاوەکو لێکەوتەکانى شەڕ کۆتاییاندێت".

یەکێتیی ئەوروپا هەڵوێستى خۆى لەبارەى بڕیارى پەکەکە بۆ خۆهەڵوەشاندنەوە و چەکدادان راگەیاند و داوای لەسەرجەم لایەنەکان کرد دەرفەتەکە بقۆزنەوە و پێکەوە کار بۆ بەدیهێنانی ئاشتی بکەن.

ئەمڕۆ دووشەممە (12ـی ئایاری 2025) ئەنوەر عەنونی، گوتەبێژی کاروباری دەرەوەی یەکێتیی ئەوروپا لە کۆنفرانسێکی رۆژنامەوانیدا رایگەیاند، یەکێتییەکە بڕوای وایە، دەستپێکردنی پرۆسەی ئاشتی بە ئامانجی چارەسەرێکی سیاسی بۆ کێشەی کورد، هەنگاوێکی ئەرێنی دەبێت بۆ گەیشتن بە چارەسەرێکی ئاشتییانە و سەرتاسەری.

ئەنوەر عەنونی، گوتەبێژی کاروباری دەرەوەی یەکێتیی ئەوروپا ئەوەشی گوت، "داوا لە هەموو لایەنەکان دەکەین ئەم دەرفەتە بقۆزنەوە و پرۆسەیەکی گشتگیر لەسەر بنەمای دیالۆگ و ئاشتەوایی دەستپێبکەن، دۆزینەوەی چارەسەرێکی دادپەروەرانە و سەرتاسەریی بەرێزگرتن لە مافە بنەڕەتییەکان و سەروەری یاسا تەنها سوودی بۆ هاوڵاتییانی تورکیا نابێت بەڵکو دەبێتە هۆی درووستبوونی سەقامگیری لە هەموو ناوچەکە".

ئەمڕۆ 12ـی ئایاری 2025، ئەنجامی کۆنگرەی 12ـی پەکەکە راگەیەندرا کە لە پێنج بۆ حەوتی ئەم مانگە لە هەرێمی پاراستنی میدیا بەسترابوو، تێیدا بڕیاری خۆهەڵوەشاندنەوە و چەکدانانی پەکەکە درا.

دوای ئەوەی پەکەکە راگەیەندراوی کۆنگرەی 12ـی بڵاوکردەوە و ئاماژەی بەوەکرد بڕیاری خۆهەڵوەشاندنەوە و چەکدانانیان داوە، سەرکردایەتیی پارتی دیموکراسیی و یەکسانیی گەلان (پارتی دەم) دەستی بە کۆبوونەوە کردووە.

کۆبوونەوەکە بە سەرۆکایەتیی هەریەک لە تونجەر باکرهان و تولای هاتیمۆغوڵڵاری هاوسەرۆکانی پارتی دەم، پێشنیوەڕۆ دەستیپێکردووە و بەردەوامە.

پارتی دەم راگەیەندراوێکدا دەڵێت، ئەنجوومەنی ناوەندیی راپەڕاندنی پارتەکە، لە ناوەندی گشتیی لە کۆبوونەوەدایە.

تونجەر باکرهان لەکاتی هاتنی بۆ کۆبوونەوەکە، بە رۆژنامەوانانی راگەیاند، بە هەڵوەشاندنەوەی پەکەکە و چەکدانان هیچ ئاستەنگێک لەبەردەم چارەسەرکردنی پرسی کورد نەماوە.

کاردانەوەی ئاکپارتی بەرامبەر بڕیاری چەکدانان و خۆهەڵوەشاندنەوەی پەکەکە بەردەوامە و ئەفکان ئالا، بریکاری سەرۆکی گشتیی پارتەکە دەڵێت، "قۆناغێکی زۆر گرنگ لە رێبازی تورکیای بێ تیرۆر تێپەڕێندرا".

ئەفکان ئالا، لەرێگەی هەژماری خۆیەوە لە تۆڕی کۆمەڵایەتیى ئێکس پەیامێکی لەبارەی خۆهەڵوەشاندنەوە و چەکدانانی پەکەکە بڵاوکردووەتەوە و دەڵێت، "قۆناغێکی زۆر گرنگ لە رێبازی تورکیای بێ تیرۆر تێپەڕێندرا و قۆناغێک دەستیپێکردووە، کە تیایدا دەبێت پێکهاتە نایاساییەکان هەڵبوەشێنرێنەوە".

ئەفکان ئالا، کە بەشدارە لەو پرۆسەیەی ئێستا لە ئارادایە و لە پرۆسەی پێشووی چارەسەریشدا بەشدار بووە و دەشڵێت، "لەو قۆناغە گرنگەی ئێستا پێیگەیشتووین، میکانیزمەکانی پەیوەست بە کارەکان و بەڕێوەبردنی پرۆسەکە، بەوشێوەیەی پێویست بێت بەگەڕدەخرێن".

ئەفکان ئالا ئەوەش دەڵێت، بە مکوڕی بەرەو ئامانجی تورکیای بێ تیرۆر هەنگاو دەهاوێژن.

عومەر چەلیک، گوتەبێژی گوتەبێژى پارتى داد و گەشەپێدان "ئاکپارتی" خۆهەڵوەشاندنەوە و چەکدانانی پەکەکە بە هەنگاوێکی گرنگ ناودەبات و دەڵێت: "دەبێت بە تەواوەتی و لەسەرجەم رەهەندەکانەوە بەشێوەی کردەیی جێبەجێبکرێت".

 عومەر چەلیک، لەبارەی ئەنجامى کۆنگرەی 12ی پەکەکە بۆ خۆهەڵوەشاندنەوە و چەکدانان راگەیەندراوێکى بڵاوکردەوە.

چەلیک دەڵێت، "خۆهەڵوەشاندنەوە و چەکدانانى پەکەکە هەنگاوێکى گرنگە لەڕووی ئامانجی تورکیای بێ تیرۆر و کۆتاییهاتنى تەواوەتیى تیرۆر دەرگا بەڕووى قۆناغێکى نوێدا دەکاتەوە".

گوتەبێژى ئاکپارتى بە پێویستی دەزانێت ئەم بڕیارە بە کرداری و تەواوەتی  جێبەجێبکرێت و دەشڵێت، "دەبێت بڕیارەکە سەرجەم لق و درێژکراوە نایاساییەکانى پەکەکە بگرێتەوە".

دەشڵێت، پرۆسەکە لەلایەن سەرجەم دامەزراوەکانیانەوە بەوردى چاودێریى دەکرێت و ئاماژە بەوەدەکات هەر هەنگاوێکی ئەرێنی، هەنگاوێکی دیکەی ئەرێنی بەدوای خۆیدا دەهێنێت.

نێچیرڤان بارزانی سەرۆکی هەرێمی کوردستان پێشوازی لە بڕیاری خۆهەڵوەشاندنەوە و چەکدانانی پەکەکە دەکات و دەڵێت، كاتى ئه‌وه‌يه‌، ئەم هەنگاوە گرنگه‌ بە هەنگاوی ديكه‌ى ئەرێنی و پێويست لەلایەن هەموو لایەنە پەیوەندیدارەکانەوە وەڵامبدرێتەوە.

لە راگەیەندراوەکەی نێچیرڤان بارزانیدا هاتووە، خۆهەڵوەشاندنەوە و چه‌کدانانی پەکەکە و به ‌پیره‌وه‌چوونی بانگه‌وازی ئۆجەلان "نيشانه‌ى پێگەیشتنی سیاسييه‌ و رێگە بۆ دیالۆگێکی راستەقینە دەکاتەوە، کە پێکەوەژیان و سەقامگیری لە تورکیا و سەرتاسەری ناوچەکە بەهێز دەکات".

سەرۆکی هەرێمی کوردستان راشیگەیاندووە، ئێستا كاتى ئه‌وه‌يه‌، ئەم هەنگاوە گرنگه‌ بە هەنگاوی ديكه‌ى ئەرێنی و پێويست لەلایەن هەموو لایەنە پەیوەندیدارەکانەوە وەڵامبدرێتەوە، جگەلەوەی ئه‌مه‌ زەمینەیەکی دروست و گونجاو ده‌هێنێته‌ ئاراوه‌ و ده‌بێته‌ بنەمای ئاشتییەکی هەمیشەیی و گشتگیر، کە کۆتایی بە دەیان ساڵ له‌ توندوتیژی و ئازار و مه‌ينه‌تى دەهێنێت و ناوچەکە بەرەو ئاسۆی نوێی پێشکەوتن دەبات.

نیچێرڤان بارزانی پێزانینی خۆی بۆ رۆڵی رەجەب تەیب ئەردۆغان، سەرۆکی تورکیا دەربڕیوە لەبەرامبەر پشتگیریکردن و هه‌وڵه‌کانی بۆ سه‌رخستنی پرۆسه‌که‌ و جەختیشدەکاتەوە، "هەرێمی کوردستان وه‌ك هه‌ميشه‌ پشتگیريی هه‌موو هەوڵێك‌ بۆ چارەسەرکردنی ناکۆکییەکان بە شێوەیەکی ئاشتیانە دەکات".

سەرۆکی هەرێمی کوردستان ئاماژەی بەوەشکردووە، ئامادەیی تەواوی خۆیان بۆ به‌رده‌وامی له‌ پێشکەشکردنی هه‌ر جۆرە يارمه‌تى و هاوكارييه‌ك بۆ سەرکەوتنی ئەم دەرفەتە مێژووییە دووپاتدەکەنەوە.

سەعدى ئەحمەد پیرە، گوتەبێژی یەکێتیی نیشتمانیی کوردستان، هەڵوێستى حیزبەکەى لەبارەى بڕیارى خۆهەڵوەشاندنەوە و چەکدادانى پەکەکە رایگەیاند، یەکێتی لە دێر زەمانەوە بۆچوونى وابووە کێشەى سیاسى بە شەڕ چارەسەر ناکرێت و بژاردەى شەڕى پێباش نەبووە.

سەعدی ئەحمەد پیرە بە کەناڵ8ـى راگەیاند، بافڵ جەلال تاڵەبانی سەرۆکی یەکێتیی نیشتمانیی کوردستان بە ئاشکرا چەند جارێک پشتیوانی لە بژاردەی ئاشتی و چارەسەری کێشەکان کردووە.

گوتەبێژی یەکێتی، ئاماژەى بەوەشکرد، مام جەلال لەسەرەتاى نەوەدەکان هەوڵیدا پەیوەندى لەنێوان تورگوت ئۆزال و پەکەکە دروستبکات، پاش 33 ساڵ ئێستا لایەنەکان گەیشتوونەتە بۆچوونى مام جەلال بۆ هەڵبژاردنی ئاشتی بۆ چارەسەری کێشەکان.

سەعدی ئەحمەد پیرە، گوتیشى، "لەو بڕوایەدان هۆکارى سزاکانی سەر فڕۆکەخانەی سلێمانی پەیوەندیی بە پرسی پەکەکەوە هەبووە".

دەشڵێت، چەکدانانی پەکەکە و خۆهەڵوەشاندنەوەی، دەستکەوتێکی گەورەیە بۆ کورد و تورک رێگەخۆشکەرە بۆ ئەوەی برایەتیی کورد و تورک هاوشێوەی پێشوو بەردەوام بێت.

ئەوەش لەکاتێکدایە، ئەمڕۆ دووشەممە 12ی ئایاری 2025 ئەنجامی کۆنگرەی 12ی پەکەکە بڵاوکرایەوە، کە لە رۆژانی پێنج و حەوتی ئایاردا بەڕێوەچووبوو. پەکەکە لە ئەنجامی کۆنگرەکەیدا بە فەرمیى هەڵوەشاندنەوەى پێکهاتەی رێکخراوەیى و کۆتاییهێنانى بە خەباتى چەکداریى راگەیاند.