نێردەی هاوپەیمانیی باکووری ئەتڵەسی (ناتۆ) لە عێراق رایگەیاندووە کە رێککەوتنەکەیان لەگەڵ وەزارەتی بەرگریی عێراق درێژخایەنە و ئامانجی سەرەکی پاڵپشتیکردنی هێزە چەکدارەکانی عێراقە، بە شێوازێکی بەهێزتر و متمانەپێکراوتر ئەم هەوڵانە بۆ یارمەتیدانی عێراقە بۆ گەیشتن بە توانای ئەمنیی تەواوی خۆی کە کاریگەرییەکی ئەرێنی لەسەر ئابووری و کۆمەڵگەی عێراق دەبێت.

پێشینەی کارەکانی ناتۆ لە عێراق؛ ئاسایشی ئەلیکترۆنی و بەڕێوەبردنی قەیرانەکان

نێردەی ناتۆ لە عێراق لە راگەیەندراوێکدا ئاماژەی بەوەکردووە کە ئاسایشی ئەلیکترۆنی و بەڕێوەبردنی قەیرانەکان دەخرێنە پێشینەی کارەکانیانەوە. راوێژ و راهێنانەکانیان کە پێشکەش بە هێزە چەکدارەکانی عێراق دەکرێن، بە ئامانجی زیادکردنی کاریگەریی سوپاکە و بەرزکردنەوەی تواناکانیانە لە بوارە جیاوازەکاندا.

پاکێجی بنیاتنانەوەی توانای بەرگری و ئاسایش

بەگوێرەی راگەیەندراوەکە، وەزارەتەکانی بەرگری و ناوخۆی عێراق لەگەڵ نێردەی ناتۆ هاوڕان کە هەوڵەکان بە ئاڕاستەی پاڵپشتیکردنی توانای هێزە چەکدارەکان و پۆلیسی فیدراڵی بێت. لەم چوارچێوەیەشدا، پاکێجێک بۆ بنیاتنانەوەی توانای بەرگری و ئاسایشی هێزە چەکدارەکانی عێراق ئامادەکراوە، کە مەشق و فێرخوازی لە چەند بوارێکی جیاوازدا لەخۆدەگرێت، لەوانە:

•             چاکسازی لە کەرتی ئەمنی.

•             هەڵوەشاندنەوەی بۆمبەچێنراوەکان.

•             مامەڵەکردن لەگەڵ بۆمب و مینە نەتەقیوەکان.

•             پلاندانانی مەدەنی و سەربازی بۆ ئۆپەراسیۆنەکان.

•             بەرگریی ئەلیکترۆنی.

•             پزیشکیی سەربازی و راهێنانی پزیشکی.

•             راهێنانی سەربازی و فریاگوزاریی مەدەنی.

جگە لەوانەش، نێردەی ناتۆ راوێژکاری و پاڵپشتی رۆژانە پێشکەش بە بەڕێوەبەرایەتییەکانی وەزارەتی بەرگری و دامەزراوە پەروەردەییە سەربازییەکان دەکات، بۆ بەرزکردنەوەی کاراییان و بەهێزکردنی تواناکانیان.

پەیوەندییەکانی عێراق و ناتۆ: فراوانکردنی ئەرکەکان

رێککەوتنی عێراق و ناتۆ لە تەمموزی ساڵی 2015 لەسەر داوای عێراق ئەنجامدرا و دوای ساڵێک لە لوتکەی وارشۆ رەزامەندیی لەسەردرا. دواتر لە مانگی ئابی 2023دا، رەزامەندی لەسەر فراوانکردنی ئەرکی ناتۆ لە عێراق درا، بە جۆرێک کە بوارەکانی دەرەوەی سەربازییش بگرێتەوە، لەوانە:

•             سەروەریی یاسا و حوکمڕانی.

•             رووبەڕووبوونەوەی گەندەڵی.

•             پاراستنی مەدەنی.

•             ژنان، ئاشتی و ئاسایش.

•             پەروەردەی پیشەیی و دامەزراوەیی.

•             پشتیوانیکردن لە بەشداریکردنی ژنان لە هێزەکانی عێراق.

•             بەرەوپێشبردنی رێزگرتن لە مافەکانی مرۆڤ.

ئەم فراوانکردنەی ئەرکەکان نیشانەی پابەندبوونی ناتۆیە بە پشتگیریکردنی عێراق لە هەموو بوارەکاندا بۆ گەیشتن بە سەقامگیری و پێشکەوتن.